Toshkent davlat texnika universiteti tasdiqlayman

Mikroblarni undirish texnikasi. Tekshirish xususiyatiga va manbaning xiliga qarab, mikroblar suyuq yoki qattiq oziqli muhitlarga ekiladi. Mikroblarni ekish vaqtida oziqli muhitga havodan yot mikroblarni tushirmaslik chorasi koʻriladi. Buning uchun ekish texnikasita toʻla-toʻkis rioya qilish zarur.
Mikroblar yoqib qoʻyilgan spirt lampasining bevosita yonida turib ekiladi, qovuzloq (bakterial ilmoq), pipetkaning uchlari shu lampaning alangasiga tutib sterillanadi, probirkani ochgan va yopgan vaqtda chetlari alangaga tutiladi, shuningdek paxta tiqinlarni probirkalarning ogʻziga tiqishdan ilgari ular ham alangaga tutib qizdirib olinadi. Mikroblar undirilgan probirkalarga havodan yot mikroblar tushirmaslik uchun bu probirkalar chap qoʻlning bosh barmogʻi bilan koʻrsatkich barmogʻi orasida qiyshaytirib ushlanadi. Probirkalarning ogʻziga tiqib qoʻyilgan paxta tiqinlar oʻng qoʻlning nomsiz barmogʻi va jimjilogʻi bilan chiqariladi. Bir tiqin shu barmoqlar orasida, ikkinchi tiqin esa jimjiloq bilan kaft orasida ushlab turiladi. Probkalarni chap qoʻl barmoqlari bilan (koʻrsatkich barmogʻi bilan oʻrta barmogʻi, oʻrta barmogʻi bilan nomsiz barmogʻi oʻrtasida) ham ushlash mumkin. Manba olishda, shuningdek mikroblarni ekishda chaqqon harakat qilinadi.
Mikroblarni suyuq muhitlarga qovuzloq (petlya-ilmoq), Paster pipetkasi yoki darajalangan pipetkada ekiladi. Suyuq manbani pipetkalar bilan tomiziladi, quyuq manbani esa sterillangan qovuzloqda olib, probirka devoridagi muhit sirtiga biroz surtiladi, soʻngra probirkani bir oz qiyshaytirib yoki silqitib olinadi yoki qovuzloqni bulyonga botiriladi. Mikroblar ekilib boʻlgach qovuzloqni lampa alangasiga albatta tutib, choʻgʻ holiga keltiriladi, pipetkalarni esa dezinfeksiyalovchi eritmalarga botirib qoʻyiladi.
Mikroblarni zich muhitlarga quyidagicha ekiladi. Flakonlardagi agarni suv hammomida suyultiriladi, 50°C haroratgacha savitiladi va sterillangan Petri likobchalariga balandligi 3-5 mm qalinlikda tekis qilib quyiladi. Agar qotadi, soʻngra termostatda 15-20 minut quriydi. Mikroblarni agarga yo qovuzloqda yoki shpatelda ekiladi. Manbani qovuzloqda olinadi va qovuzloqni agar sirtiga parallel qilib chiziq tortiladi.