Тошкент Давлат техника

15.2. Электр симларини таъмирлаш
Электр симларида қуйидаги носозликлар учрайди: сим тармоқлари ва учларининг (наконечниклари) шикастланиши, туташув қисмлари, қисма ва изоляциясининг бузилиши. Симлардаги бундай носозликлар, сим узилганда ток узатилишининг батамом тўхташи, қисман қониқарсиз қотириш ёки бирикмани кавшарлаш пайтида туташмаларнинг оксидланиши ҳисобига қаршиликнинг ортиб кетиши оқибатида юзага келади. Симлар изоляциясининг бузилиши симларнинг қисқа туташувига ва токнинг йўқотилишига сабаб бўлади.
Симларнинг узилган жойлари назорат лампаси ёрдамида аниқланади. Электр жиҳозларининг схемасидан ишламаётган истеъмолчига бориш йўли аниқланади ва электр занжирининг шу участкаси текширилади. Лампанинг қисмаси массага уланади, шчуп ёрдамида ишламаётган асбобдан ток манбаигача бўлган оралиқда навбатма-навбат теккизиб кўрилади. Назорат лампасининг ёниши узилишнинг текширилаётган қисмлар яқинида эканлигини кўрсатади. Текширилаётган участкани шунтлаш билан симнинг узилган жойини аниқлаш мумкин. Узилган симлар кавшарлаб таъмирланади.
Қаршилиги катта бўлган туташмаларнинг носозликлари волтметр ёрдамида аниқланади.
Қисмлардаги кучланишнинг пасайишини а вариант бўйича текширилганда икки марта ўлчаш натижалари солиштириб аниқланади. Кучланиш пасайишини аниқроқ ўлчаш учун, шкаласи 0-2 В бўлган волтметр қўлланилади.
Қисқа туташув жойлари назорат лампаси ёрдамида аниқланади. У аккумулятор батареясининг клеммалари орасига уланади ва ўтказгич билан ажратиб қуйилади. Дастлаб занжирда ток манбаидан ажратгичларгача қисқа туташув борлиги текширилади. Бунинг учун улар «Узилган» («Виключено») ҳолатига қуйилади. Лампанинг ёниши текширилаётган занжирда қисқа туташув борлигини кўрсатади. Ундан сўнг занжирнинг ҳар бир участкаси ажратгичдан навбатма-навбат ток манбаи йўналишида ажратилади. Агар назорат лампаси ёнмаса, истеъмолчи занжирда қисқа туташув борлигидан дарак беради. Занжирда қисқа туташув бўлган истеъмолчини аниқлаш учун истеъмолчилар навбатма-навбат уланади. Агар истеъмолчи ишламаганда назорат лампаси ёнса, бу текширилаётган занжирда носозлик борлигини кўрсатади.
Қисқа туташув изоляцияси шикастланган сим қисмини массадан ажратиб, изолясион тасма билан ўраб қуйиш керак.
Сим ўрнатилгандан сўнг занжирдаги кучланишнинг пасайиши текширилади. Унинг қиймати 0,5-0,6 В дан ошмаслиги лозим.
Стартёр симида кучланишнинг пасайиши ҳар 100 А га 0,12-0,20 В гача бўлишига рухсат этилади.