Toshkent davlat sharqshunoslik instituti sharq filologiyasi fakulteti tarjima nazariyasi va amaliyoti kafedrasi

Mavzuning dolzarbligi.Yurtimiz mustaqillikka erishgandan so‘ng, amalga oshirilgan islohotlar O‘zbekistonni jahon hamjamiyatining eng rivojlangan davlatlari qatoriga qo‘shib, o‘zligimizni namoyon etishga qaratilgandir. Ayniqsa, ta’limga berilayotgan alohida e’tibor, yoshlarni bilim olishiga keng imkoniyatlarni yaratib berish Prezidentimizning kelajak avlodga bo‘lgan yuksak ishonchining namunasidir. Yurtimiz bugungi kunda jahonga yuz tutayotgan ekan, o‘z-o‘zidan chet tillarining ahamiyati ortib bormoqda. Hozirgi kunda jahon xalqlari tajribalaridan xabardor bo‘lish, turli xorijiy tillarni mukammal bilish katta ahamiyatga ega. Shu jumladan, koreys tilini o‘rganuvchi vatandoshlarimiz soni tobora o‘sib borayotgani ham shu katta e’tiborning mevalaridan biridir. Oliy ta’lim muassasalarida xorijdan kelgan mutaxassislarning amaliy yordami xorijiy tillarni mukammal o‘rganishda yanada qo‘l kelmoqda.

Buyuk ma’rifatparvar bobomiz Abdulla Avloniyning so‘zlari bilan aytganda, “Har bir millatning dunyoda borlig‘ini ko‘rsatadurgan oyinai hayoti til va adabiyotidur.”³Darhaqiqat, biz koreys tilini o‘rganish orqali Koreya tarixi, madaniyati, san’ati va adabiyoti bilan yaqindan tanishamiz. Shu bilan birga o‘zbek va koreys xalqlarining madaniyati hamda tilning grammatik tuzilishi jihatidan ba’zi o‘xshashliklar ham koreys tilini yanada chuqurroq o‘rganishga sabab bo‘lmoqda.

Shuningdek Prezidentimiz quyidagicha fikr bildirgan edilar: “…. Yaponiya yoki Janubiy Koreyani olaylik. Bu mamlakatlarning 2-jahon urushidan keyin qanday og‘ir ahvolga tushib qolganini hammamiz yaxshi bilamiz. Xo‘sh, ular nimaning evaziga qisqa davr ichida bu qadar rivojlanishga erisha oldi? Axir, bu o‘lkalarda mol-ko‘l tabiiy xomashyo manbalari, mineral resurslar deyarli yo‘q-ku! Albatta, bu borada o‘sha paytda dunyoda mavjud bo‘lgan siyosiy omillar, xalqaro vaziyatning ta’sirini inkor etib bo‘lmaydi. Lekin yapon va koreys xalqi asrlar davomida shakllanib, katta bunyodkor kuchga aylangan o‘ziga xos milliy ma’naviyati hisobidan ham rivojlangani bugungi kunda hech kimga sir emas. Shuning uchun “yapon mo‘jizasi” yoki “koreys mo‘jizasi” haqida gap ketganda taniqli ekspert va mutaxassislar ham birinchi galda “yapon xarakteri” “koreys tabiati” degan iboralarni tilga oladi. Tabiiyki, ular bu o‘rinda avvalo, mazkur xalqlarga mansub ma’naviy fazilatlarni nazarda tutadi”⁴. O‘z-o‘zidan ma’lumki, koreys xalqning mentaliteti uning leksikasida ham namoyon bo‘ladi. Koreyscha frazeologizmlarni o‘rganish jarayonida biz bu xalqning o‘zigagina xos bo‘lgan milliylikni, ularning ma’naviy fazilatlarini ko‘rib guvohi bo‘ldik.