Тошкент давлат иқтисодиёт университетида магистрлик диссертациясини тайёрлаш, расмийлаштириш ва ҳимоя қилиш тўғрисида

Тошкент давлат иқтисодиёт университетида
магистрлик диссертациясини тайёрлаш, расмийлаштириш
ва ҳимоя қилиш тўғрисида
НИЗОМ


I. Умумий қоидалар

1. Ушбу Низом Ўзбекистон Республикасининг 2020 йил 23 сентябрдаги ЎРҚ–637-сон «Таълим тўғрисида»ги Қонуни, Ўзбекистон Республикаси Президентининг «Олий малакали илмий ва илмий-педагог кадрлар тайёрлаш ва аттестациядан ўтказиш тизимини янада такомиллаштириш тўғрисида» 2012 йил 24 июлдаги ПФ–4456-сон ҳамда «Ўзбекистон Республикаси олий таълим тизимини 2030 йилгача ривожлантириш концепциясини тасдиқлаш тўғрисида» 2019 йил 8 октябрдаги ПФ–5847-сон Фармонлари, Ўзбекистон Республикаси Вазирлар Маҳкамасининг «Магистратура тўғрисидаги Низомни тасдиқлаш ҳақида»ги 2015 йил 2 мартдаги 36-сон қарорига мувофиқ Тошкент давлат иқтисодиёт университетида (кейинги ўринларда Университет деб юритилади) магистрлик диссертацияси мазмуни ва сифатига қўйиладиган мезонлар ва талаблар ҳамда магистрлик диссертациясини тайёрлаш ва уни ҳимоя қилиш тартибини белгилайди.

2. Университет магистратура талабаларининг якуний давлат аттестацияси Олий ва ўрта махсус таълим вазирининг 2009 йил 22 майдаги 160-сон буйруғи билан тасдиқланган Ўзбекистон Республикаси олий таълим муассасалари битирувчиларининг якуний давлат аттестацияси тўғрисидаги низомга мувофиқ амалга оширилади.
3. Магистрлик диссертацияси университетнинг магистратура талабаси томонидан долзарб мавзу юзасидан шахсан олиб борилган, тадқиқот моҳияти тегишли талабларга жавоб берган, тугалланган ва мазмунан яхлит илмий иш сифатида илмий янгилиги ва амалий натижалари тизимли равишда асослаб берилган қўлёзма ҳуқуқига эга бўлган илмий асардир.
4. Университетда магистрлик диссертацияларини тайёрлашни мувофиқлаштириш Магистратура бўлими томонидан амалга оширилади, бўлим кафедралар ва бошқа таркибий бўлинмалар билан биргаликда қуйидагиларни таъминлайди:
магистрлик диссертацияси мавзулари долзарб, тегишли соҳадаги мавжуд муаммоларни илмий ва амалий жиҳатдан ҳал этишга қаратилиши;
магистрлик диссертациясини тайёрлаш жараёни устидан доимий мониторинг олиб борилиши.