Tillarni o’qitish metodikasi kafedrasi

Maktabgacha ta’limda 6-7 yoshli bolalarda chet tilidan dastlabki bilimlarni berish ularda kommunikativ, o‘yin, ijtimoiy, bilish kompetensiyalarni shakllantirish jarayoni bilan integratsion shaklda olib boriladi. Bunda bolaning nutq, muloqot malakalari, bilish jarayonining rivojlanish sohalari doirasida amalga oshriladi. Bola nutqni tinglaydi, video lavhalarni ko‘radi va anglash orqali chet tili muhitiga kirib boradi.
Umumiy o‘rta talim maktablarida chet tili (1) amaliy, (2) umumta’limiy, (3) tarbiyaviy va (4) rivojlantiruvchi maqsadlarda o‘rgatiladi.
Chet tili o‘qitishning amaliy maqsadiga erishish yo‘lida umumta’lim maktab kursida chet til o‘rgatishning yakuniy amaliy maqsadi - tinglab tushunish va o‘qish, ya’ni chet tilida tinglab, o‘qib axborot olishdir.
Chet tili o‘qitishning umumta’limiy maqsadi o‘rganilayotgan til vositasi orqali foydali hayotiy axborot va til haqidagi yangi sodda ma’lumotlarni o‘zlashtirish ko‘zda tutiladi. O‘quvchining umumiy saviyasini ko‘tarish, o‘rganilayotgan til va madaniyat haqida yangi ma’lumotga ega bo‘lish, muloqot madaniyatini yuksaltirish, fikrlash qobiliyatini rivojlantirish kabilarga erishiladi. Ushbu maqsadni amalga oshirishda asosan lingvistik, strategik (kompensator), oquv-kognitiv, diskursiv layoqatlar takomillashadi.
Chet tili o‘qitishning tarbiyaviy maqsadi oquvchilarga g‘oyaviy tarbiya berish, aqliy mehnat malakalarini singdirish, ularning bilish faolligini oshirish mazkur maqsadning mohiyatini tashkil etadi.
Chet tili o‘qitishning rivojlantiruvchi maqsadi didaktikadagi rivojlantiruvchi ta’lim ma’nosi bilan hamohang bo‘lib, o‘quvchi shaxsining aqliy, hissiy va motivastion jihatlarini rivojlantirishni ifodalaydi. O‘quvchi intellektual va ma’naviy oziqa oladi, nutqiy muloqotda o‘z hissiyotini sinab ko‘radi, muloqotdosh (o‘quvchi, muallim, diktor va b.) lar fikrini bilish va o‘z fikrini bayon etish orqali uning shaxsi kamol topib boradi. Ta’lim jarayonida, jumladan, chet til o‘rganishda me’yordagi lisoniy va nutqiy qiyinchiliklarni yengib o‘tish o‘quvchi tafakkuri va his-tuyg‘ularining rivojlanishini ta’minlaydi.