Тил миллат бойлиги. Уни асраб-авайлаш ҳар биримизнинг бурчимиздир. Бу тилни ўрганиш ҳаётий зарурат бўлибгина қолмай, Ўзбекистоннинг ҳар бир фуқароси учун мажбурият даражасидадир

Тил – миллат бойлиги. Уни асраб-авайлаш ҳар биримизнинг бурчимиздир. Бу тилни ўрганиш ҳаётий зарурат бўлибгина қолмай, Ўзбекистоннинг ҳар бир фуқароси учун мажбурият даражасидадир. Она тилимизни келажак авлодга ўргатиш учун умумтаълим мактабларида, академик лицей ва касб-ҳунар коллежларида, қолаверса, олий таълим муассасаларида анчагина ўқув соатлари ажратилган. Ўз-ўзидан, бу иш ўқитувчиларимизнинг машаққатли меҳнати ва давлатимизнинг ажратаётган талайгина сармоясисиз амалга ошмайди. Афсуслар бўлсинки, аксарият забондошларимиз бундан етарли даражада фойдаланмаяптилар. Кўча-кўйда юрганимизда, овқатланиш манзилларида, транспортларда, бошқа шу каби жамоат жойларида, хуллас, ҳар қадамимизда рекламалар, эълонлар, афишалар ёзилган плакатларга кўзимиз тушади. Улардаги имловий ёки пунктуацион хатоларни кўриб эса таъбимиз бир мунча хира тортади. Бу ҳақда ўша эълону афишаларнинг эгаларига айтсак, “Буни мен ёзмаганман-ку! Хато бўлса, ҳарф терувчининг айби-да”, деб қўя қолади. Лекин бу ёзув плакатларига буюртма берган аксарият кишилар ҳарф терувчининг хатосини айтиб, норозилик билдирмайдилар. Балки, хатоликни пайқамаслар ҳам. Айниқса, ижтимоий тармоқлардаги ёзишмаларга назар ташласак, айрим ўринларда нақадар гўзал бўлган тилимиздан асар ҳам тополмай қоламиз баъзида. “Ў” ўрнига “6”, “Ч” ўрнига “4” ёки “С”, “Ш” ўрнига “W” ёзилган ўринларни кўриб, бир томондан бу ёзув соҳибидан жаҳлингиз чиқса, бир томондан унга раҳмингиз келади. Бу нима? Эътиборсизликми? Саводсизликми? Масъулиятсизликми? Балки, тилга бўлган ҳурмат ҳиссининг етарли даражада шаклланмаганидан далолатдир. Ҳар не бўлганда ҳам, бў қусур бизнинг миллатимизга ярашадиган нарса эмас. Оғзаки нутқимиз чегараланмаган. Уни маълум қоидаларга солиш ҳам анча қийин масала. Лекин ёзма нутқимизни тартибга солмас эканмиз, тўлақонли баркамол инсон, етук миллат вакили бўла олмаймиз. Шундай экан, тил қоидаларига амал қилиб, бехато ёзишга ҳаракат қилайлик. Зеро, тилимиз жаҳон ҳамжамиятига бизни кўрсатиб турувчи бир кўзгудир.

Сирожиддин Холбоев тайёрлади