Tibbiy buyumlar va uskunalarni dezinfeksiya va sterilizatsiya qilish. Usullari. Vositalari. Tartiblari. Sterillangan tibbiy buyumlar va uskunalarning saqlanish qoidalari. Atamalar va ta’riflar

7.3. Tibbiy asbob-anjomlar yuvuvchi-dezinfeksiyalovchi mashinada tozalash va dezinfeksiya qilish
7.3.1. Tibbiy asbob-anjomlarni yuvish mashinasida tozalash va dezinfeksiya qilish asosan quruq joylangandan keyin amalga oshiriladi.
7.3.2. Tibbiy asbob-anjomlar nam joylanganda tozalash va dezinfeksiya uchun ishlatiladigan vositalar kam ko‘piruvchan bo‘lishi kerak, chunki ko‘pik yuvish bosimini va mashinada yuvish samaradorligini ancha kamaytirishi mumkin.
7.3.3. Kuchli ifloslangan asboblar (stomatologik asboblardagi qurib qolgan mato qoldiqlari, yopishib qolgan plombalash materiallari va h.k.) ga, mashinaga solishdan oldin dastlab qo‘lda ishlov berilishi yoki ultratovushli vannada yuvib tashlanishi kerak.
7.3.4. Yuvuvchi-dezinfeksiyalovchi mashina yordamida samarali yuvish va dezinfeksiya qilish uchun to‘rsimon lotoklarni, kassetalarni, ushlagichlarni va boshqalarni mashinaga to‘g‘ri joylashtirish kerak.
7.3.5. Sharnirli asbob-anjomlar ochilgan holatda joylashtirishi kerak.
7.3.6. Tibbiy asbob-anjomlar yuvuvchi eritmalar bilan yuvilishini ta’minlash maqsadida ular to‘rsimon lotoklarga zich joylashtirilmasligi kerak.
7.3.7. Tibbiy asbob-anjomlarni mashinaga joylashtirishda ularning mexanik ta’sirchanligi va chidamliligi inobatga olinishi kerak.
7.3.8. Tibbiy asbob-anjomlar belgilangan dasturda zararsizlantirish tugagandan keyin darhol mashinadan olinishi kerak, chunki yopiq mashinada uzoq qolib ketganda qoldiq namlik zanglashni keltirib chiqarishi mumkin.
7.3.9. Mashinada yuvish va dezinfeksiyalash uchun termik va kimyoviy termik usullardan foydalaniladi.
7.3.10. Termik va kimyoviy-termik dezinfeksiya bilan tozalash dasturi quyidagi bosqichlardan iborat:
- dastlabki yuvish;
- tozalash;
- birlamchi oraliq yuvish;
- qo‘shimcha oraliq yuvish;
- termik dezinfeksiya/oxirgi yuvish;
- quritish.
7.3.11. Tibbiy asbob-anjomlarni termik usulda zararsizlantirishda dezinfeksiya ishlari +65°C dan yuqori haroratda amalga oshiriladi.
7.3.12. Termolabil tibbiy asbob-anjom va buyumlar zararsizlantirishda kimyoviy-termik usullardan foydalaniladi. Ushbu holatda yuvishdan keyin mashinada dezinfeksiyalashga mo‘ljallangan dezinfeksiya vositasidan foydalaniladi. Tibbiy asbob-anjomlarni yuvish va quritishning barcha etaplarida harorat chegaralangan bo‘lishi kerak.
7.3.13. Termik usulda dezinfeksiya qilish usulida suvning harorati datchiklar orqali nazorat qilinadi.
7.13.14. Termik va kimyoviy-termik dezinfeksiya ishlari sifatini nazorat qilish uchun yuvuvchi-dezinfeksiyalovchi mashinaga ish boshlanishidan oldin yuvishning birinchi sikliga testlar qo‘yiladi.