Тиббий биология ва генетика Тиббиёт олийгохи талабалари учун дарслик

2.7. ҲУЖАЙРАНИНГ КИМЁВИЙ ТАРКИБИ
Химиявий анализ орқали ҳужайра таркибида атмосфера ва ер қобиғида кенг тарқалган моддалар борлиги аниқланган.Ҳужайрада Д.И. Менделеев даврий системасидаги кимёвий элементларнинг 85 дан кўпроғи учрайди.Ҳужайра таркибига кирувчи кимёвий элементлар фоиз кўрсатгичига қараб уч гуруҳга: макро, микро ва ультрамикроэлементларга бўлинади.
Макроэлементлар ҳужайра таркибига кирувчи элементларнинг 98 фоизини ташкил қилиб, барча ҳаётий муҳим биологик моддалар таркибига киради. Уларга водород, кислород, углерод ва азот киради. Микроэлементларга 8 та элемент кириб, улар ҳужайра таркибига кирувчи элементларнинг 2 фоизидан камроғини ташкил қилади. Уларга магний, натрий, кальций, темир, калий, олтингугурт, фосфор, хлор киради. Ультрамикроэлементларга рух, мис, йод, фтор, марганец, кобалт, кремний ва бошқа элементлар кириб, ҳужайрада жуда кам миқдорда 0,1 % атрофида бўлади.
1. Макроэлементлар – 98%, кислород – (О₂) 75% гача, углерод (C)12% гача, водород (H₂) 8 % гача, азот (N₂) 3% гача.
2. Микроэлементлар – 1,9 % – калий (К), фосфор (P), олтингугурт (S), магний (Мg), хлор (Cl), кальций (Ca), натрий (Nа), темир (Fе).
3. Ультрамикроэлементлар 0,01 % – иод (J), мис (Cu), кобалт (Co), рух (Zn), молибден (Мо), бром (Br), марганец (Мn), бор(B) ва бошқалар (6-жадвал).
Ҳужайрада водород, кислород, углерод биргаликда углеводлар ва ёғларни ҳосил қилади. Оқсиллар ва нуклеин кислоталар таркибида юқоридаги 3 та элементлардан ташқари азот, олтингугурт ва фосфор ҳам мавжуд. Калий, натрий ва хлор ҳужайра мембраналари орқали турли моддаларни ўтказиш ва уларнинг тургор ҳолатини таъминлайди. Шу билан бирга нерв ҳужайраларининг қўзғалиши шу элементлар иштирокида рўй беради ҳамда калий ва натрий ҳужайра мембранасида биотокни ҳосил қилади. Кальций ва фосфор суяк тўқималарини ҳосил қилишда иштирок этиб, уларнинг мустаҳкамлигини таъминлайди. Бундан ташқари кальций қоннинг нормал ивишини таъминловчи муҳим омил ҳисобланади, унинг етишмовчилиги ҳисобига организмда спазмофилия касаллиги келиб чиқади.
Ультрамикроэлементлар ҳужайра таркибида жуда кам бўлишига қарамасдан улар айрим ферментлар, гормонлар ва витаминлар таркибига киради. Уларнинг етишмаслиги ва ортиб кетиши натижасида организмда моддалар алмашиниши бузилади ва ҳар хил касалликлар келиб чиқишига сабаб бўлади.