Термиз давлат университети «ахборот технологиялари» кафедраси

Спамга қарши кураш. Спамни тўхтатишнинг бир қатор усуллари мавжуд. Улардан бири спаммерга жавоб ёзиб ундан бу манзилни рўйхатдан чиқариб ташлашни талаб қилиш. Лекин бу усул унчалик самарали эмас. Чунки деярли ҳамма вақт улар ўзларининг ҳақиқий манзилларини яширадилар ва боғланиш учун кўрсатилган манзил одатда фойдаланилмайдиган, ўлик манзил бўлиб чиқади.
Кўпгина почта дастурлари келаётган хабарларни саралаш имконини беради. Бундай дастурлар баъзи манзиллардан келаётган хабарларни ўтказмайдилар ёки уларни махсус папкага жойлаб қўядилар. Почта манзилига спам келганда унинг манзилини дастурга кўрсатиб қўйиш мумкин ва дастур бу манзилдан келган ҳеч бир хабарни ўтказмайди. Бу амал спамни саралаш ёки блокировка қилиш деб аталади.

5.2.-расм. Спамни саралаш ва блокировка қилиш
Лекин одатда спаммерлар хабарни ким жўнатгани ҳақидаги маълумотни қалбакилаштирадилар. Бу эса дастурий таъминотнинг ишини қийинлаш-тиради. Бундан ташқари, спаммерлар спам жўнатиладиган манзилларни ўзгартириб турадилар.
Спамга қарши провайдерлар ҳам курашадилар. Бу анча самарали усул бўлиб, уларда спамни аниқлаш учун кўпроқ маълумот бўлади (улар турли манзилларга юборилган хабарларни солиштира оладилар). Бундан ташқари, улар хабарнинг мазмунини таҳлил қиладиган дастурий таъминотга ҳам эгадирлар. Шу сабабли, спам олинганда бу ҳақида провайдерни огоҳлантириш спамга қарши курашнинг энг самарали усулларидан биридир.
Провайдерлар ва бошқа онлайн хизмат эгалари уларнинг тармоқларига кириб келаётган барча хабарларни саралаш имконига эгалар. Улар спам келадиган манзиллар рўйхатини тузадилар ва уни тўлдириб борадилар.
Провайдерлар спамга қарши бошқа самарали воситалардан ҳам фойдаланадилар. Провайдерлар спам тарқатувчиларни аниқлаб, уларни судга беришлари ҳам мумкин. Спам тарқатувчиларни аниқлаш, улар келтирган зарар миқдорини ҳисоблаш чиқиш ва уларнинг айбларини исботлаш анча мушкул иш бўлса ҳам, спаммерларни қонуний равишда судга мурожаат қилиш билан қўрқитиш кўпинча уларнинг спам тарқатишларини тўхтатишларига олиб келади.