Термиз давлат университети «ахборот технологиялари» кафедраси

Назарий маълумот:
Давлат бошқарувида аудиоконференция ва
видеоконференцияларнинг ўрни.
Давлат ва жамият бошқарувида ахборот технологияларининг ўрни ошиб, АКТ ривожланишнинг муҳим омилига айланди. Бугун ҳар бир соҳада инновацион ечимларни жорий қилиш, аҳолига интерактив хизмат кўрсатиш замон талабига айланди. Ўз навбатида, бу вазифаларни амалга оширишда мутахассислардан тажриба ва замонавий билимни талаб қилади. Жумладан, хорижий давлатлар етакчи мутахассислари билан тажриба алмашиш ва мулоқот ўрнатиш учун албатта, аудиоконференция, видеоконференция муҳим аҳамият касб этади. Эслатиб ўтиш жоиз, аудиоконференция ва видеоконференция вақтни ҳам, маблағни ҳам тежаш, масофани қисқартириш омили ҳисобланади.
Интернет орқали ўзаро мулоқот деганда бир вақтни ўзида бир неча давлат хизматчиларининг, бир-бирлари билан интернет тармоғи орқали алоқа ўрнатиши тушунилади. Бундай мулоқот жараёнида давлат органлари ходимларининг (хорижий ва миллий) жойлашув ўрни аҳамиятга эга эмас, яъни улар қаерда бўлишларидан қатъий назар Интернет тармоғи орқали мулоқот ўрната оладилар. Бундай сўзлашувларни амалга ошириш учун махсус дастурлар бўлиши талаб қилинади. Бундай дастурларга Skype, Мейл Агент, Google Talk, ICQ дастурлари киради.
Интернет орқали сўзлашув жараёнида микрофон ва эшитиш қурилмасини компьютерга улаб келтирилган дастурлар ёрдамида фойдаланувчилар сўзлашиб мулоқот қилишлари мумкин. Бунда Интернет орқали мулоқот жараёни ходимларга тезкорлиги, арзонлиги ҳамда сифатлилиги билан қулайликлар яратиб беради.
Интернет конференциялар – бу муайян муаммони ҳал қилаётган гуруҳ иштирокчиларининг Интернет тармоғи орқали конференц алоқаси ёрдамида ўзаро ахборот алмашиниш жараёнидир. Табиийки, бу технологиядан фойдаланиш ҳуқуқига эга бўлган шахслар доираси чекланган бўлади. Компьютер конференцияси иштирокчилари сони аудио - ва видеоконференциялар иштирокчилари сонидан анча кўп бўлиши мумкин. Адабиётларда телеконференция атамасини кўп учратиш мумкин. Телеконференция ўз ичига конференцияларнинг уч турини: аудио, видео ва компьютер конференцияларини олади.