Тема: Анатомия панинин классификациясы рауажланыу тарийхы хам уйрениу методы

Miysheniń ishki dúzilisi

Miyshe qaq ortasınan aldınan arqaǵa qarap kesip, eki (oń hám shep) bóleklerge ajıratılsa, onıń aq, zatı menen sırtınan qaplanǵan kúlreń zatınıń terekke usap shaqalanıp ketkenin kóriw múmkin. Sonıń ushında oǵan ómir teregi degen at berilgen.
Miysheniń aq zatı kólemi kúlreń zatqa qaraǵanda bir qansha kishirek. Ásirese qurt ishindegi aq zat júdá juqa qabattan ibarat bolıp, aldınǵı miy shatırı, arqadaǵı shatır menen qosılıp ketedi. Bul eki shatır IV qarınshanıń aldınǵı hám arqa diywalların quraydı.
Miyshe ústingi hám tómengi pállelerge ajıratıp kesilse, onıń orayındaǵı aq zatlarda tórt jup ózekti kóriw múmkin.
Miysheniń aq zatı, uzınlı-kelte nerv talaları jıyındısınan ibarat bolıp, talalardıń bazı birewleri miyshe ózeklerin bas miy qabıǵı menen, basqaları miysheni oraylıq nerv sistemasınıń basqa bólimleri menen, úshinshileri bolsa miyshe bólimlerin óz-ara qosıwǵa (baylawǵa) xızmet etedi.

Romb tárizli miy qısıǵı (isthmus rhomvencepholi)

Romb tárizli miy menen orta miy aralıǵına, yaǵnıy olardıń birinen ekinshisine ótetuǵın jerge tarayǵan moyın yaki qısıq delinedi. Onıń quramına tómendegiler kiredi: 1. Miysheniń ústingi ayaqshaları. 2. Miysheniń aldınǵı shatırı.
3. Ilmektiń úshmúyeshligi. Qısıtıń eki qaptal tárepinde jaylasqan hám onsha kórine bermeytuǵın bul úsh múyeshli tegislikten qaptal (sırtqı) ilmektiń esitiwge tiyisli talaları ótedi.
Usı qısıqtıń tusında IV qarınshanıń aldınǵı sheti jaylasqan.

Tórtinshi qarınsha- ventriculus quartus

Úshinshi miy torsıldaǵı ishindegi boslıq keyin ala belgili bir formaǵa iye bolıp, tórtinshi qarınshaǵa aylanatuǵını belgili. Sonıń, ushında bul qarınsha artqı miydiń, aldınǵı hám arqadaǵı bólimleri, yaǵnıy Varoliy kópiri menen miyshe aralıǵında jaylasadı hám arqadan arqa miy oraylıq kanalı menen, aldınnan miy suw jolı arqalı III- qarınsha menen tutasıwınsha qaladı. Qarınshanıń tómende jaylasqan túbi romb formaǵa iye bolǵanı ushın oǵan romb tárizli shuqır degen at berilgen. Eki qaptal tárepindegi keń múyeshler qaltasha sıyaqlı dúziliske iye bolǵanlıqtan qaptal qapshalar dep ataladı.
IV qarınshanıń, tóbesi miysheniń, aldınǵı hám arqa shatırınan quralǵan. Arqa shatırıdıń ishki, qarınsha boslıǵına qaraǵan júzinde qarınshanıń tamır perdesi jaylasqan. Bul perde rawajlanıw dáwiriniń, baslanǵısh waqıtlarında qarınsha ishin pútkil qaplap turǵan bolsada, keyin ala onda úsh tesik payda boladı. Bul tesiklerdiń eń úlkeni rombtárizli shuqırdıń tómengi múyeshinde bolıp, oǵan Mejendi tesigi delinedi, qalǵan ekewi bolsa eki qaptal múyeshlerdiń qaltaları tusında boladı. Bul tesikler arqalı IV qarınsha miydiń tamırlı perdesi astındaǵı boslıqlar menen tutasqanlıǵı sebepli qarınshalar ishindegi suyıqlıq miy perdeleri arasınada ótedi hám aylanıp júredi.