Тема: Анатомия панинин классификациясы рауажланыу тарийхы хам уйрениу методы

Miyshe (kishi miy)- cerebellum

Miyshe adamda artqı miydiń eń úlken bólegi bolıp, adamnıń hámme hám hár qıylı háreketlerin bir qálipke keltirip turıwshı sonıń menen birge teńsalmaqlılıqtı saqlap turatuǵın aǵza.
Miyshe bas súyeginiń ishki tiykarındaǵı arqa bóliminiń astında jaylasqan.
Onıń astında aldınǵı tárepke awıńqırap Varoliy kópiri menen uzınsha miy turadı.
Miysheniń ústindegi hám astındaǵı tárepleri, aldınǵı hám arqa qırǵaqları bar. Tómengi tárepiniń ortasında aldınnan arqaǵa qaray baǵdarlanǵan keń batıńqı bolıp, onda uzınsha miy turadı.
Miyshe úsh bólimnen quralǵan, eki qaptal táreptegi keń hám úlken bóleklerge miy yarım sharları hám olardıń aralıǵındagı kishkene oraylıq bólekke qurt delinedi.
Ústingi hám júzeki táreptegi miysheniń yarım sharları bir – birinen dúnki menen ajıralǵan. Bul dúnki eki tárepke páseyip barıp, tegis júzelerge aylanıp ketedi. Miysheniń arqa qırǵaǵındaǵı jaqsı bilinetuǵın keń kemtik eki yarım shardı arqa tárepinen ajıratıp turadı. Usınday kemtik aldınǵı qırǵaqtada bar.
Miysheniń júzide bas miy taqılette kúlreń zat penen qaplanǵan, hám kitap betleri sıyaqlı jaylasqan qısqa iyrekliklerge (izvilina) bólinedi.
Miysheniń qurt bólimi yarım sharlarǵa salıstırǵanda ádewir erte payda bolǵan.
Miysheniń ajıralıp turatuǵın bóleksheleriniń biri onıń párshesi esaplanadı. Bul bólim hár bir yarım sharlardıń astınǵı tárepinde miysheniń orta ayaqshasına jaqın jaylasqan. Bul párshe bólimine baylanıslı bolǵan jáne bir bólim túyinshe ajıratıladı. Párshe óziniń, jińishke ayaqshası járdeminde túyinshe menen qosılǵan. Bul ayaqta ishki tárepten juqa, yarımay tárizli miy plastinkası menen tutasıp ketedi.
Miyshe bas miydiń basqa bólimleri menen úsh jup ayaqshalar járdeminde qosılǵan. Bul ayaqshalar ótkiziwshi talalar toplamınan ibarat. Ayaqshalardıń eń juwanı orta ayaqsha (yaki miyshe - kópir ayaqshaları) bolıp tabıladı. Bul ayaqsha qaptal tárepke keńeyip barıp Varoliy kópiri menen tutasadı Ekinshisi, ústingi
ayaqshalar yaki miysheniń, tórt tóbelikke baratuǵın ayaqshası. Bul ayaqshanıń talaları miysheniń tisli ózeginen baslanıp, orta miydegi qızıl ózekke shekem baradı.
Úshinshi ayaqshaǵa tómengi ayaqshalar (yaki miysheden uzınsha miyge barıwshı) delinedi.
Miyshe bas miydiń 10% quraydı.