Тема: Анатомия панинин классификациясы рауажланыу тарийхы хам уйрениу методы

Uzınsha miy - myelencephalon

Uzınsha miy bas miy menen arqa miy arasında jaylasqan. Onıń, tómendegi ushı úlken eńse tesigi shegarasında arqa miy menen qosıladı. Keńeygen ústingi ushı aldı tárepinen Varoliy kópiriniń arqa qırǵaǵına tiyip turadı, arqa hám joqarǵı tárepinen uzınsha miydi romb tárizli shuqır ortasınan kesesine kesip ótken jip sıyaqlı dúzilmeler shegaralaydı. Uzınlıǵı orta esapta 25 mm.
Uzınsha miy dúzilisi jaǵınan arqa miy dúzilisiniń tap ózin tákirarlaydı desek adaspaymız, Bulda aldınǵı tárepinen ortasınan shuqır jarıq, arqa tárepinen orta qarıq járdeminde bir - birine teń eki pállege bólingen h.t.b. Aldınǵı orta jarıqtıń eki tárepindegi jaqsı bórtip kóringen dizimshelerge piramidalar delinedi. Bul piramidalar háreketlendiriwshi nerv talaları (ótkiziwshi jollar) toplamınan ibarat bolıp, talalardıń bir bólimi uzınsha miy menen arqa miy shegarasında aldınǵı jarıq, ishinde, qarama-qarsı táreptegi piramida talaları menen kesisip hám arqa miydiń qaptal tárepindegi dizimshesi boylap tómenge ketedi. Sonıń ushın aldınǵı jarıq bul talalar kesisken jerde onsha shuqır bolmaydı. Kesispegen talalar bolsa óz
tárepindegi aldınǵı piramidadan piramida jolların payda etip, tómenge baǵdarlanadı. Onıń talaları hár bir segmenttiń tusında óz - ara kesisip baradı.
Piramidalardıń Varoliy kópirine jaqın bóliminiń qaptal táreplerinde tómengi olivalar turadı. Bular adamda júdá jaqsı rawajlanǵan.
Miyshe menen birgelikte teń salmaqlılıqtı saqlawda xızmet qılatuǵın bul olivalar uzınsha formada bolıp, kúlreń ózeklerden dúzilgen. Oliva menen piramida arasında aldınǵı qaptal qarıqtıń dawamı tamamlanıp tap usı jerden XII jup miy nerviniń tamırları shıǵadı.
Uzınsha miydiń arqa tárepindegi dúzimelerdiń jaylasıw tártibi, aldınǵı táreptegi dizimshelerdiń jaylasıw tartibinde salıstırǵanda ózgeshelikke iye. Olar óz shegaralarına jetip barmastan romb tárizli shuqırdıń tómengi múyeshin payda etip qaptal tárepke qıysayıp baslaydı da, miysheniń tómengi ayaqshaların payda etedi.