Statistika” fanidan Oʻquv-uslubiy majmua

Qisqacha xulosalar

Statistika deganda ilk bor mamlakatning iqtisodiy va siyosiy ahvolini sonlar va iboralar yordamida izohlash tartibi haqidagi fan tushunilgan bo‘lsa ham, hozirgi kunda bu so‘z ko‘p ma’noda qo‘llaniladi: Statistika-bu: 1)turmush, jamiyat hayoti haqidagi aniq sonlar, ko‘rsatkichlar to‘plami; 2) mazkur ma’lumotlarni to‘plash, ishlash,umumlashtirish, saqlash va yetkazib berish bilan bog‘liq bo‘lgan faoliyat sohasi; 3) ommaviy jarayonning ustidan ko‘p kuzatishlar o‘tkazish natijasida olingan umumlashtiruvchi mezonlar, ko‘rsatkichlar;4)ilm-fanning maxsus sohasi.Statistika fani ommaviy hodisa va jarayonlarni o‘rganadi, ularda namoyon bo‘ladigan statistik qonuniyatlarni aniqlaydi, ularning me’yorini belgilaydi. U o‘z uslubiyatiga ega va ommaviy jarayonni o‘rganish uslubi sifatida moddiy dunyo va ilm-fanning hamma sohalarida qo‘llanadi. Ayniqsa ijtimoiy-iqtisodiy, ommaviy hodisalarni bilishda,idrok qilishda statistika beqiyos katta rol o‘ynaydi. Bu sohada olib borilgan tekshirish va kuzatishlarni umumlashtirish natijasida statistika fan sohasi tarzida shakllanganligi va taraqqiy etib kelayotganligi bejiz emas. Uning uslubiyati barkamol topishida matematika va boshqa aniq fanlar hissasini ham inkor etib bo‘lmaydi.

Satistika ko‘p tarmoqli ijtimoiy fandir. Statistika fani uchun umumiy xos bo‘lgan hususiyatlarni statistikaning umumiy nazariyasi o‘rganiladi. Agar statistika tarixi shu fanni kelib chikishi, shakllanishi, tashkil topishi va rivojlanishini o‘rgansa, matematik statistika tarmoqlararo balanslarni tuzish, korrelyatsion tahlil usullarini qo‘llash, ko‘p variantli prognozlarni tuzish yo‘llarini o‘rganadi.
Nazorat va mustaqil ishlash uchun savollar va topshiriqlar

1. 
   Statistika atamasi qanday kelib chiqqan va ilk bor nimani anglatgan?
   
2. 
   Statistika so‘zi hozir nimalarni bildiradi?
   
3. 
   Statistika predmetli fanmi?
   
4. 
   Statistika uslubmi?
   
5. 
   Ommaviy hodisa va jarayon nima va ular qanday xususiyatlarga ega?
   
6. 
   Statistik qonuniyat nima? U dinamik qonuniyatdan qanday farq qiladi?
   
7. 
   Katta sonlar qonunining mohiyati nimadan iborat? Statistika uchun u qanday ahamiyatga ega?
   
8. 
   Statistika uslubi qanday masalalarni o‘rganishda qo‘llanadi? Misollar keltiring va tushuntirib bering.