Sport psixologiya

3.1. YOSHGA QARAB PSIXOLOGIK MASLAHAT BERISH

Yoshga qarab psixologik maslahat berishning umumiy vazifasi bola psixik taraqqiyoti borishini, bu jarayonni davrlarga bo‘lish va belgilangan normaga muvofik, tasavvurlar asosida nazorat qilishdan iborat. Bu umumiy vazifa hozirgi kunda quyidagi aniq, vazifalarni o‘z ichiga oladi:

- Ota-onalarni, o‘qituvchilarni va bola tarbiyasida ishtirok etadigan boshqa shaxslarni bola psixik taraqqiyotining yosh va individual xususiyatlariga jalb qilish;

- Psixik taraqqiyotning buzilishlarini va har xil normadan chetga chiqishlarni o‘z vaqtida aniqlash va ularni psixologik-tibbiy va pedagogik maslahatlarga yo‘llash;

- Jismoniy yoki nerv psixik sog‘ligi kuchsizlangan bolalarda ikkinchi marta psixologik asoratlarning oldini olish bo‘yicha tavsiyalar berish (bolalar patopsixologiyasi va vrachlar bilan birgalikda);

- Pedagog-psixologlar bilan birgalikda o‘qituvchilar, ota-onalar va boshqa shaxslar uchun maktab ta'limidagi qiyinchiliklarni psixologik-pedagogik tuzatish (korreksiya) bo‘yicha tavsiyanomalar tuzish;

- Oilada bola tarbiyasi bo‘yicha tavsiyanomalar tuzish (oila psixoterapiyasi mutaxassislari bilan birgalikda);

- Bolalarga va ota-onalarga maslahatlar berishda maxsus guruhlar bilan tuzatish (korreksiya) ishlarini olib borish.

Aniq maslahat berish vazifalarini yechishda L.S.Vigotskiy maktabi psixologlarining bola psixikasi individual taraqqiyoti muammolari bo‘yicha umumiy fikrlaridan foydalanish mumkin. Quyida bularga qisqacha to‘xtalib o‘tamiz. Psixik faoliyatning individual shakllari bola insoniyat tajribasini o‘zlashtirish jarayoni asosida vujudga keladi va rivojlanadi. Ana shu tajribani o‘zlashtirish bolaning faol faoliyatidan, muloqotdan, o‘yindan, o‘kishdan tashqarida bo‘lishi mumkin emas.