Синф раҳбарини ўқувчиларда бадиий қадриятларимизни ўрганишга бўлган қизиқишларини фаоллаштиришнинг педагогик омиллари

Тадқиқот ишининг долзарблиги:
Ўқитувчи жамиятнинг ёш авлод таълим – тарбиясига қўйилган ижтимоий буюртмасининг асосий ижрочисидир. Шунинг учун ҳам республикамиз Президенти И.А. Каримов “ Тарбиячи – устоз бўлиш учун, бошқаларнинг ақл – идрокини ўстириш, маърифий зиёсидан баҳраманд қилиш, ҳақиқий фуқаро этиб етиштириш учун, энг аввало тарбиячининг ўзи айнан шундай юксак талабларга жавоб бериши, ана шундай буюк фазилатларга эга бўлиши керак” – деган эди. Дарҳақиқат ўқитувчилик касбида чуқур билимдонлик, зукколик ўз касб маҳоратини мунтазам такомиллаштириб боришга иштиёқ бўлмас экан, у яхши устоз – ўқитувчи бўла олмайди. Зеро, давлатимизнинг истиқболи, Президентимиз томонидан олға сурилаётган барча ислохотларнинг ижобий ечими ана шу кўп минглик зиёкорлик ишининг самарасига боғлиқ. Шунинг учун ҳам бугунги мустақиллик шароитида ўқитувчилик касбига бўлган эътибор ва эҳтиёж ҳар қачонгига нисбатан ортиб бормоқда. Шунинг билан бирга ўқитувчи олдига қўйиладиган талаблар ҳам ўзгача бўлмоқда. Чунки, бугун Ўзбекистон мустақил Давлат сифатида жаҳонга юз тутар экан, бу борада педагог – ўқитувчиларнинг ўз ўрни, ўзига хос моҳияти борлигини асло унутмаслик лозим.
“Кадрлар тайёрлаш миллий дастури” да кўтарилган барча тадбиру – амаллар республикамизнинг ақлий салоҳиятини оширишга қаратилган экан. Бу энг аввало ўқитувчи касбига бўлган муносабатни туб жиҳатдан ўзгартиришни, унинг маънавий – ахлоқий ва ақлий камолотини ошириш лозимлигини тақозо этади.
Ватанимизда ўсиб келаётган ёш авлодни тарбиялаш давлат сиёсати даражасига кўтарилган масаладир. Ҳуқуқий демократик давлат қуриш ва жамият тараққиётининг ривожи ўсиб келаётган авлоднинг таълим ва тарбия даражасига боғлиқдир.
Ўзбекистон Республикасини ижтимоий сиёсатида шахс манфаатлари ва таълим устиворлиги, баркамол инсонни шакллантириш, таълим сирларини эгаллаш жараёнида ўқувчининг қобилиятларини, имкониятларини, ўзига хос индивидуал хусусиятларини ўрганиш, йўналтириш ва ривожлантириш мақсадида таълим муассасалари, умумий ўрта таълим мактабларида синф раҳбарининг ўрни алоҳида эътиборга лойиқдир.
Синф раҳбари ишининг ўзига хос хусусияти шундан иборатки, у оддий болалар жамоасини эмас, балки ўқувчилар жамоасини шакллантиради. Ўқувчиларнинг асосий вазифаси ўқишдан иборат. Шунинг учун синф раҳбари даставвал болаларнинг ўқишга қандай муносабатда эканликларини, ўзларини қандай тутишларини, уй вазифаларини сидқидилдан бажаришларини ёки бажармасликларини аниқлайди. Ва ниҳоят, энг муҳими, уларнинг ўқишидаги мўлжаллари нималардан иборатлиги, бу мўлжаллар ижтимоий моҳиятга молик ёки молик эмаслиги хисобланади. Педагог синф билан ишлашнинг дастлабки босқичида турли вазиятларга дуч келиши мумкин.
Синф раҳбари жамоа ривожланишининг аниқланган даражасига қараб тарбия усулларини танлайди. Бунда ўқувчиларнинг ёш хусусиятларини хисобга олиш қўшимча шарт хисобланади. Педагог шахсни ҳар томонлама етук камол топтиришда катта роль ўйнайди.