Щзбекистон республикаси олий ва щрта махсус таoлим вазирлиги

Роликли пайвандлаш. Мазкур усулда пайвандлаш қурилмаси 32 - расмда келтирилган. Расмда : 1 - пайвандлаш трансформатори; 2- роликли электродлар ; 3- роликларни айланма ҳаракатга келтирувчи юритма; 4 - пайвандланаётган деталлар.
Мазкур усулда, айланаётган роликлардан ток ўтказиш орқали деталларни узлукли ва узлуксиз чок билан пайвандлаш амалга оширилади. Пайвандлаш хусусиятларига кўра нуқтали пайвандлаш усулига ўхшайди. Роликли пайвандлаш кичик қалинликдаги юпқа деталларни, масалан ёқилғи баклари, турли маъсулотни ташиш учун белгиланган бочкаларни пайвандлаш ишларида қўлланилади.

Бешинчи бўлим

______________________________________________


Электрокимёвий ишлов бериш қурилмалари


§ 18. Электрокимёвий ишлов бериш бўйича умумий тушунчалар.

Таянч сўзлар ва иборалар: Электрокимё; электролитлар; электролитик диссоциация; молизация; электролитларда электр токи; ионнинг металлдан чиқиш иши; гидратация энергияси; катионлар; анионлар; электрокимёвий эквивалент.

Электрокимё - фан сифатида ионлар фаолияти ва шунингдек, қаттиқ жисм ва қоришма ўртасидаги чегарадаги ходисаларни ўргатади. Бундай ходисаларни ўрганишда қоришма сифатида электролитлар асос қилиб олинади.
Электолитлар деб, электролитик диссоциация натижасида ионлар ҳаракатидан иборат электр токини ўтказиш қобилиятига эга бўлган моддалар, қоришма ва эритмаларга айтилади. Металлар ва ярим ўтказгичлардан фарқли ўлароқ электролит қоришмалари ва эритмалари ион ўтказувчанлигига эга.
Электролитик диссоциация деб моддаларнинг (молекулаларнинг) эриш ёки қоришиш даврида зарядланган ионларга ажралиш жараёнига айтилади. Бунда, диссоциация оқибатида ҳосил бўлган мусбат ва манфий ионлар сони бир - бирига тенгдир. Мусбат ионлар ўзидан бир ёки бир нечта электронини йўқотган атом ёки молекулани ифодаласа, манфий ионлар эса, аксинча бир ёки бир нечта ортиқча электронга эга бўлган атом ёки молекулаларни ифодалайди. Мисол учун, ош тузини сувда эритиш оқибатида унинг молекуласи икки ионга ажралади, яъни Na⁺ ва Cl^- .
Электролитларда диссоциация жараёни билан бир пайтда унга тескари бўлган, яъни ионларнинг алоҳида молекула бўлиб бирлашиш жараёни амалга оширилади. Бундай жараён молизация деб аталади.
Электрод - электрод тизимида металлда ҳам, электролитда ҳам худди ўша ионлар мавжуд. Металлда ушбу ионлар криссталл решётка (катак) тугунларида жойлашган бўлса, электролитда ушбу ионлар эритувчининг молекулалари билан боғланган бўлади. Ионни кристалл катак (решётка) тугунидан электролитга ўтиши учун маълум энергия сарфланиши керак. Ушбу энергия ионнинг металлдан чиқиш иши деб аталади. Ионни электролитдан металлга ўтиши учун эса гидратация энергияси деб аталадиган маълум иш бажарилиши талаб қилинади.