Shoʻr yerlar melioratsiyasi

Qishloq xo‘jaligiga mo‘ljallangan yerlarni sho‘r yuvishga tayyorlash va sho‘r yuvish ishlarini tashkil etish tartibi to‘g‘risida
NIZOM
1-bob. Umumiy qoidalar
1. Mazkur Nizom qishloq xo‘jaligiga mo‘ljallangan yerlarni sho‘r yuvishga tayyorlash va sho‘r yuvish ishlarini tashkil etish tartibini belgilaydi.
Ushbu Nizom talablari agroklastyerlar, fermer xo‘jaliklari va qishloq xo‘jaligi mahsulotlarini yetishtiruvchi boshqa tashkilotlarga nisbatan tatbiq etiladi.
2. Qishloq xo‘jaligiga mo‘ljallangan yerlarni sho‘r yuvishga tayyorlash va sho‘r yuvish ishlarini tashkil etish mazkur Nizomga 1-ilovada keltirilgan sxemaga muvofiq amalga oshiriladi.
2-bob. Sho‘r yuvish ishlarini rejalashtirish
3. Yerlarning sho‘rini yuvish ishlarini rejalashtirish yerlarning meliorativ holatiga qarab belgilanadi.
4. O‘zbekiston Respublikasi Suv xo‘jaligi vazirligi hamda uning hududiy organlari tomonidan har yili 1-oktabrga qadar suv resurslarining prognozlariga asosan xizmat ko‘rsatadigan foydalanuvchi tashkilotlarning (suv iste’molchilari uyushmalarining) suv olish limitlari belgilangan tartibda tasdiqlanadi va joylarga yetkaziladi.
5. Suv iste’molchilarining suv olish limitlari ularga xizmat ko‘rsatadigan foydalanuvchi tashkilotlar (suv iste’molchilari uyushmalari) tomonidan belgilangan tartibda tasdiqlanadi va yetkaziladi.
6. Xizmat ko‘rsatadigan foydalanuvchi tashkilotlar (suv iste’molchilari uyushmalari) har yili 20-oktabrga qadar agroklastyerlar, fermer xo‘jaliklari va boshqa qishloq xo‘jaligi mahsulotlari yetishtiruvchilar bilan birgalikda suv olish limitlari asosida suvdan foydalanish va suv iste’moli rejalarini, shuningdek, tegishli shartnomalarni belgilangan tartibda rasmiylashtiradi.
7. Qoraqalpog‘iston Respublikasi Suv xo‘jaligi vazirligi va irrigatsiya tizimlari havza boshqarmalari huzuridagi meliorativ ekspeditsiyalar (keyingi o‘rinlarda — Meliorativ ekspeditsiyalar) har yili 1-noyabrga qadar hududlar bo‘yicha meliorativ kadastr hujjatlarini ishlab chiqadi.
Bunda sug‘oriladigan yerlarning sho‘rlanish darajasi, yer osti suvlari sathi va minerallashuv ko‘rsatkichlari o‘rganiladi hamda tahlil qilinadi. Sug‘oriladigan yerlarning sho‘rlanish darajasi, yer osti suvlari sathi va minerallashuv xaritalari ishlab chiqiladi.
8. Meliorativ ekspeditsiyalar har yili 10-noyabrga qadar yerlarni sho‘r yuvishga tayyorlash va sho‘r yuvish ishlarini amalga oshirish bo‘yicha ushbu Nizomga 2-ilovaga muvofiq shaklda ilmiy asoslangan tavsiyalarni (keyingi o‘rinlarda — Tavsiyalar) ishlab chiqadi hamda agroklastyerlar, fermer xo‘jaliklari va boshqa qishloq xo‘jaligi mahsulotlari yetishtiruvchilarga (keyingi o‘rinlarda — suv iste’molchilari) yetkazadi.
9. Suv iste’molchilari xizmat ko‘rsatadigan foydalanuvchi tashkilotlar (suv iste’molchilari uyushmalari) bilan birgalikda ularga berilgan Tavsiyalar va suv iste’moli rejalariga asosan yerlarni sho‘r yuvishga tayyorlash va sho‘r yuvish ishlari rejalarini har yili 20-noyabrga qadar ishlab chiqadi.