Sanoat ishlab chiqarishini tashkil etish

Moliya yili – birinchi yanvardan o’ttiz birinchi dekabr kuni oxirigacha bo’lgan vaqtni o’z ichiga oluvchi davr.
Monitoring – (ingl. monitoring – kuzatish, nazorat qilish) – ma’lum bir hodisa yoki jarayonning holatini kuzatish, hisobga olish, baholash va istiqbolini belgilash. Investitsiya loyihalarini moliyalashtirish sohasida qo’llaniladigan monitoring berilgan ssuda (qarz)ni qoplash va unga foiz to’lash jarayonining borishi ustidan nazorat qilishda namoyon bo’ladi.
Monopoliya (yun. mono – tanho, poleo – sotaman) – iqtisodiyotning bir sohasida tanho hukmronlik; bozorni tashkil etish shakli.
Moddiy xarajatlar – xom ashyo va asosiy materiallar, yordamchi materiallar, yoqilg’i, energiya va boshqa xarajatlardan iborat.
Mehnat unumdorligi – ishlab chiqarish jarayonida kishilar mehnatining foydaliligi, samaradorligi va mahsuldorligi. Mehnat unumdorligi ishlovchining ma’lum vaqt birligi (soat, smena, oy, yil) ichida tayyorlagan mahsulot hajmi bilan o’lchanadi. Mehnat unumdorligining o’sishi mahsulot birligini ishlab chiqarishda mehnat sarfining kamayishi demakdir.
Mualliflik huquqi – keng ma’noda – fan, adabiyot va san’at asarlarini yaratish, foydalanish va huquqiy himoya qilishda vujudga keladigan munosabatlarni tartibga soluvchi huquqiy me’yorlar yig’indisi; fuqarolik huquqining bir bo’limi. Tor ma’noda – asar muallifiga tegishli bo’lgan va qonunlarda mustahkamlanib qo’yilgan shaxsiy va mulkiy huquqlar tizimini tashkil etadi.
Narx, baho – tovar qiymatining puldagi shakli; bozor iqtisodiyotida amal qiluvchi iqtisodiy dastak.
Nominal qiymat (lot. nominalis – nomi yozilgan) – pul belgilari, banknotlar, qimmatli qog’ozlarning ustiga yozib qo’yilgan qiymati, narxi.
Nou-xau (ingl. know how – qandayligini bilaman), ishlab chiqarish siri – hali hammaga ma’lum bo’lmagan va keng tarqalmagan yangi ilmiy-texnikaviy, ishlab chiqarish-texnologik, boshqarish, moliyaviy-iqtisodiy, tijoratga oid bilimlar majmui va ularni amaliyotda qo’llash tajribalari; ularga tanho ega bo’lish. U korxona uchun ham, shaxs uchun ham muayyan ustunlikni ta’minlaydi.