Самиғов н. А. Бино

Полимер асосида тайѐрланган материаллар

Ҳозирги даврда иссиқлик изоляцияси материаллари термопластик (поливинилхлорид, полиуретан, полистирол, полиметилметакрилат) ва
термореактив (карбамид-формалдегид, фенол-формалдегид ва бошқ.) полимерлар асосида таркибига газ ѐки кўпик ҳосил қилувчи компонентлар, пигментлар, қотирувчилар, пластификаторлар ва модификаторлар киритиб тайѐрланмоқда.
Ячейкали пластмассалар. Иссиқлик изоляцияси материаллари структураси жиҳатидан кўпикпластлар ва поропластларга (газопластларга) бўлинади. Кўпикпластлар пластмасса таркибига кўпик киритилгани учун ўзаро туташмаган ѐпиқ ғоваклар ва юпқа деворлардан ташкил топгандир. Поропластлар эса пластмасса таркибида ҳосил қилинган газ ташқарига чиқиб кетиш ҳисобига ўзаро туташган ғоваклар билан характерланади. Пластмасса таркибида кўпик ва газ ҳосил қилиниши натижасида аралаш структурали буюмлар олиш мумкин.
Ячейкали пластмассаларда ғоваклар 90-98% ни ташкил этади. Шунинг учун уларнинг ўртача зичлиги жуда кичик, иссиқлик ўтказувчанлик коэффициенти 0,026-0,058 Вт(м^.0С) атрофида бўлади. Бикр ва ярим бикр ячейкали пластмассалар етарли даражада мустаҳкам, эластик ва эгилувчан бўлади. Улар сувга, кучсиз кимѐвий муҳитларга чидамли, биологик шароитларга бардошли бўлади.
Ячейкали пластмассаларнинг иссиқликка бардошлилиги чегараланганлиги (100-150⁰С), кўпчилик турларининг ѐнувчанлиги ва узоқ муддатли ҳарорат таъсирида хоссаларининг ѐмонлашиши (термик деструкция) уларнинг камчилиги ҳисобланади. Ячейкали пластмассаларнинг ишлатиш ҳароратини ошириш долзарб масалалардан бири саналади. Қалинлиги 5-6 см ли кўпикпластлар 14-16 см қалинликдаги минерал пахта ѐки ячейкали бетонлар сингари иссиқлик изоляцияси кўрсаткичига эга бўлади. Ячейкали пластмассалар асосида тайѐрланган уч қатламли панелларнинг 1 м² массаси 20-50 кг камаяди.
Кўпикпласт ва поропластларни қирқиш, кесиш ва бетон, асбоцемент, металл, ѐғоч, қоғоз юзаларга елимлаш осон.
Ячейкали пластмассалар плита, қобиқ, ярим цилиндр кўринишида девор, том қоплама, қувурлар, саноат ускуналари ва бошқа конструкцияларнинг иссиқлик изоляцияси учун ишлатилади.