Самиғов н. А. Бино

Қурилиш материалларини полимер билан модификациялаш

Бетон, ѐғоч, табиий тошлар, гипс ва оҳак боғловчилар асосидаги материаллар ва бошқаларни полимерлар билан модификациялаш усулида уларнинг хоссаларини яхшилаш мумкин. Полимерлар билан модификацияланган қурилиш материалларининг мустаҳкамлиги, деформатив хоссалари, кимѐвий агрессив муҳитларга чидамлилиги юқори бўлади. Модификацияланган материалларнинг едирилишга, зарбга бардошлилиги юқори бўлади, динамик кучланишларга қаршилик қилиш хусусияти ортади.
Модификацияланган қурилиш материаллари композицион материал бўлиб, бу ерда материал одатда каркас ѐки бирламчи фаза вазифасини, полимер эса модификацияловчи матрица ѐки қўшимча вазифасини ўтайди.
Бетонларни модификациялаш. Цементли бетонлар полимерцементли бетон, бетонополимер ва полимер қопламали бетон кўринишларида модификацияланади.
Полимерцементли бетон цемент массасига нисбатан 17-20% полимер қўшилиб тайѐрланади. Бунда полимер қотиб мустаҳкам ўзига хос каркас ҳосил қилиши натижасида бетоннинг хоссалари яхшиланади. Минерал боғловчи сифатида портландцементдан ташқари пуццоланли, шлакли цементлар, силикатли ва гипсли боғловчилар ҳам ишлатилиши мумкин.
Полимер моддалар сифатида поливинилацетат (ПВА), СГС-65 ГП латекслари, сувда эрийдиган эпоксид, ацетон-формалдегид полимерлари ва бошқалар қўлланилади. Полимерлар одатда бетон қоришма тайѐрланаѐтган пайтда қўшилади.
Бетонга ПВА эмулсиясини киритиб бетоннинг чўзилишдаги ва эгилишдаги мустаҳкамлигини ошириш мумкин. Лекин ПВА эмулсияси қўшилган бетонлар қуруқ жойларда (ҳавонинг нисбий намлиги 40-50% гача) ишлатишга мўлжалланган. Уларнинг ҳавода киришиши оддий бетонга нисбатан юқори бўлади. Бунинг сабаби ПВА эмулсияси таркибидан сувнинг буғланиши ва полимернинг плѐнка холатига ўтишидир.
Эпоксид, ацетон-формалдегид каби қотирувчилар иштирокида қотадиган полимерлар киритилган бетонларнинг мустаҳкамлиги, сувга, агрессив муҳитларга бардошлилиги ва сув ўтказмаслиги ортади.
Полимерцемент бетонларнинг совуққа чидамлилиги F150-F300 маркаларда бўлади, едирилишга бардошлилиги эса цементли бетонларга нисбатан 15-20 марта юқори бўлади.
Полимерцементли бетонлар саноат бинолари, омборхоналар поллари, аэродром ва йўл қопламалари қурилишида, антикоррозион қопламалар олишда, темирбетон конструкциялар чокларини беркитишда ва бошқаларда ишлатилади.