Самиғов н. А. Бино

Махсус қоришмалар

Гидроизоляцион қоришмалар. Гидроизоляцион қоришмалар одатда портландцемент, сулфат мухитига чидамли цемент, гидрофоб цемент ва кенгаювчи цемент асосида тайѐрланади. Уларнинг таркиби 1:2,5 ѐки 1:3,5 нисбатда (цемент:қум, массаси бўйича) бўлиб, сув ўтказмаслик хусусиятини янада яхшилаш учун таркибига ҳар хил зичлаштирувчи моддалар (натрий алюминати, хлорли темир, битум эмулсияси, полимерлар, латекслар ва бошқ.) киритилади. Гидроизоляцион қоришмалар доимо нам, сув ѐки агрессив мухитлар таъсирида бўладиган бино ва иншоотларнинг қисмларини, юзаларини сувашда ишлатилади.
Инъекцион қоришмалар. Инъекцион қоришмалар арматураси аввалдан тарангланадиган темирбетон конструкциялар тайѐрлашда арматурани коррозиядан ҳимоялаш мақсадида каналларни тўлдириш учун ишлатилади. Улар цемент хамири ѐки цемент-қум аралашмаси сифатида тайѐрланган паста ҳолатида бўлиши мумкин. Майда тўлдиргич сифатида йириклик модули энг кичик ювилган кварц қумини ишлатиш мақсадга мувофиқ бўлади. Минерал боғловчи сифатида М400 ва ундан юқори маркали портландцемент ишлатилади. Цементнинг сарфи 1м³ қоришма учун 1100- 1400 кг ва 1 м³ цемент хамири учун 1300-1600 кг бўлиши керак. Инъекцион қоришманинг сиқилишга мустаҳкамлиги бўйича маркаси камида 300 бўлади.
Қоришма аралашмасининг қовушоқлигини камайтириш учун таркибига ЛСТ, милонафт каби сиртактив моддалар ва С-3 сингари суперпластификаторлар (0,1-1%, массаси бўйича) киритиш тавсия этилади.
Акустик қоришмалар. Товуш ютувчи сувоқлар тайѐрлашда ва акс садо ҳосил бўлмайдиган хоналарни сувашда акустик қоришмалар ишлатилади.
Минерал боғловчи сифатида портландцемент, шлакли портландцемент, оҳак, гипс, улар асосидаги аралаш боғловчилар ва каустик магнезит ишлатилади. Майда тўлдирувчи сифатида кўпчитилган перлит, пемза, керамзит ва шу каби ғовак материаллардан олинган, йириклиги 3-5мм бўлган бир фракцияли қумлар ишлатилади. Қоришмаларнинг ўртача зичлиги 600- 1200 кгм³ бўлиб, очиқ ғовакли структурага эга бўлади.