Самиғов н. А. Бино

Совуққа чидамлилик. Бетонга сув кириб музлаши натижасида ички зўриқиш ҳосил бўлади ва бетон асосида тайѐрланган конструкцияларни буза
бошлайди. Совуққа чидамлилик бетоннинг ғоваклигига ва ғовакликнинг характерига боғлиқ, чунки микроғовакларда сувнинг музлаш ҳарорати жуда паст бўлади. Шу сабабли таркиби тўғри танланган, яхши зичлаштирилган, мустаҳкам бетонларнинг совуққа чидамлилиги юқори бўлади.
Бетоннинг совуққа чидамлилиги томонлари 10, 15, 20 см куб шаклидаги намуналарни стандарт усулда синаб аниқланади. Совуққа чидамлилик бўйича оғир бетон қуйидаги маркаларга бўлинади: F50, F75, F100, F150, F200, F300, F400, F500. Бетон тайѐрлашда паст алюминатли цементларни ишлатиш ҳам совуққа чидамлиликни оширади.
Бетоннинг совуққа чидамлилигини ошириш учун таркибига гидрофоб ѐки дифил полимер моддалар, минерал зичлаштирувчи қўшимчалар киритиш, конструкция юзасини юпқа рулонли ѐки сепиладиган изоляция материаллари билан ҳимоялаш, юза қисмларини махсус полимерлар билан шимдириш мумкин.

4. Бетоннинг теплофизик хоссалари

Иссиқлик сиғими. Оддий оғир бетоннинг солиштирма иссиқлик сиғими 0,75-0,92 кЖ/(кг·⁰С) атрофида бўлади. Иссиқлик сиғими асосан тўлдиргичларнинг характеристикасига ва бетоннинг умумий зичлигига боғлиқдир.
Иссиқлик ўтказувчанлик. Оғир бетоннинг қуруқ ҳаво шароитидаги иссиқлик ўтказувчанлиги 1,2 Вт/(м·⁰С). Бетоннинг иссиқлик ўтказувчанлиги тўлдиргичнинг турига ва бетоннинг умумий зичлигига боғлиқ бўлади. Оғир тўлдиргичлар ўрнига ғовак енгил тўлдиргичлар ишлатилганда иссиқлик ўтказувчанлиги 2-4 марта камаяди. Бетоннинг намлиги ошса ѐки сув кириб музласа, иссиқлик ўтказувчанлиги кескин ошиб кетади. Юқори даражадаги иссиқлик ўтказувчанлик бетоннинг камчилиги ҳисобланади. Шу сабабли уйсозлик панеллари ва бошқа иссиқ-совуқдан ҳимояловчи конструкциялар тайѐрланганда оғир бетон қўшимча равишда иссиқлик изоляцияси материаллари билан таъминланади.