Salimjon buriyev, dildora maxkamova, vafabay sherimbetov ekologiya va atrof muhit muhofazasi

13.4. O‘zbekistonning ekologiya sohasidagi xalqaro hamkorligi 
 O‘zbekiston Respublikasining 1992-yili 2 martda BMTga teng huquqli a’zo 
bo‘lishi ekologiya sohasidagi xalqaro hamkorlik uchun ham keng yo‘l ochib berdi. 
Birinchi  navbatda  Markaziy  Osiyo  davlatlari  o‘rtasidagi  ikki  tomonlama  va  ko‘p 
tomonlama  hamkorlikni  rivojlantirish  katta  ahamiyaga  egadir.  Ayniqsa,  Orol  va 
Orolbo‘yining  ekologik  muammolari  Markaziy  Osiyo  davlatlari,  xalqaro 
tashkilotlarning  diqqat  markazida  bo‘lib,  ushbu  yo‘nalishda  turli  tadbirlar 
o‘tkazildi  va  amalga  oshirilmoqda.  Orolbo‘yi  aholisini  sifatli  ichimlik  suvi  bilan 
ta’minlash,  ularga  tibbiy  yordam  ko‘rsatish  hamkorlikning  asosiy  masalalaridan 
hisoblanadi.  
Jahon  Banki,  Yevropada  xavfsizlik  va  hamkorlik  tashkiloti  (EXXT)  va 
boshqalar  O‘zbekistondagi  ekologik  muammolarni  hal  qilish  ishiga  katta  hissa 
qo‘shmoqdalar.  O‘zbekistondagi  Ekologik  harakat,  xalqaro  salomatlik  fondi- 
"Ekosan",  nodavlat  notijorat  tashkilotlari  ekologik  muammolarni  hal  qilishda, 
xalqaro hamkorlikni muvofiqlashtirish ishiga o‘z
 
hissasini qo‘shmoqda. 
Mustaqil  Davlatlar  Hamdo‘stligi  (MDX)  mamlakatlari  kelishuviga  binoan 
ekologiya  sohasidagi  hamkorlik  1992  yil  tuzilgan  Davlatlararo  Ekologik  Ittifoq 
(DEI)  orqali  amalga  oshiriladi.  Ekologiya  va  tabiatni  muhofoza  qilish 
muammolarini  hal  qilishda  O‘zbekiston  Respublikasi  Markaziy  Osiyo  davlatlari, 
Osiyo,  Yevropa,  Amerika  va  Tinch  okean  mintaqasi  mamlakatlari  bilan  ikki 
tomonlama  va  ko‘p  tomonlama  hamkorlikni  rivojlantirmoqda.  Xalqaro 

---

217 
 
hamkorlikni  amalga  oshirishda  ekologik  ta’lim  va  tarbiyani  rivojlantirish 
masalalariga ham alohida e’tibor beriladi. 
O‘zbekiston Respublikasi 1985 yilgi ozon qatlamini himoya qilish bo‘yicha 
Vena  konvenstiyasi,  1987  yilgi  ozon  qatlamini  yemiruvchi  birikmalar  bo‘yicha 
Bayonnoma  (Monreal),  1989  -yilgi  (Bazel)  xavfli  chiqindilarni  chegaralararo 
tashishni  nazorat  qilish  konvenstiyasi,  1992  yilgi  Iqlim  o‘zgarishi  to‘g’risidagi 
konvenstiya,  Kioto  Bayonnomasi  (1998),  Cho‘llashishga  qarshi  kurash  (1992), 
Biologik  xilma-xillikni  saqlash  (1992)  kabi  o‘nga  yaqin  konvenstiyalarga 
qo‘shilgan. Ushbu yo‘nalishda faol harakatlar amalga oshirilmoqda. Ekologiya va 
tabiatni  muhofaza  qilish  sohasidagi  har  qanday  davlatlararo  hamkorlik  ekologik 
vaziyatni mahalliy, milliy, mintaqaviy va global darajada yaxshilashning asosidir.