Республика илмий-амалий масофавий онлайн конференцияси

Ўқувчиларга инновацион технологиялар асосида дарсларни ташкил қилиш
Д.Ибрагимова Ўзбекистон Республикаси жисмоний тарбия ва спорт вазирлиги ҳузуридаги жисмоний тарбия ва спорт бўйича мутахассисларни илмий-методик таъминлаш, қайта тайёрлаш ва малакасини ошириш маркази Cамарқанд филиали ўқитувчиси
Ф.Саидов Самарқанд вилояти Ургут туман 93 мактаб жисмоний тарбия ўқитувчиси

Узлуксиз таълим тизимининг умумий ўрта таълим босқичида дарс машғулотларини ноанъанавий услубларда ташкил этиш замон талабларидан ҳисобланади. Шунингдек, умумий ўрта таълим босқичида ўқувчи-ёшларнинг жисмоний тарбияси, таълими, тайёргарлиги ва спорт ишлари умумдавлат миқёсида олиб борилаётган ислоҳотларнинг устивор йўналишларидан ҳисобланади, ўқув машғулотлари эса, ушбу таълим соҳасида етакчи дидактик воситадир. Республикамиз таълим тизимида рўй бераётган ижобий ўзгаришлар ўқув жараёнида турли хил самарали дарс шакллардан фойдаланишни тақозо этади. Жисмоний тарбия ва спорт соҳасидаги шаклан ва мазмунан ўзгаришларнинг амалга оширилиши, масалан: мамлакатимизда профессионал спортнинг шаклланиши, миллий курашнинг таълим-тарбия тизимида ўрганилиши, шарқ курашларининг кириб келиши ана шундай мазмуний ўзгаришлар сирасига кирса, Ўзбекистон Республикасининг мустақил давлат сифатида халқаро олимпиада мусобақаларида иштирок этиши ва совринли ўринларни эгаллаши жисмоний тарбия спорт соҳасида эришилган йирик ютуқлардан ҳисобланади. Жисмоний тарбия ва спорт соҳасидаги ушбу ўзгаришларни мукаммал ўзгартириб бориш ва бу жараёнларга мослашишда анъанавий таълим тизими орқали етарлича ижобий натижага эришиб бўлмайди.

Ўқувчи ёшларнинг фаоллигига, ташаббускорлигига, ҳаракатчанлигига асосланган ноанъанавий таълим-тарбия услублари ўқитиш, таълим мазмунини ўрганиш ва билим,кўникма ва малакаларни ўзлаштириш даражаларини аниқлаш жараёнларига тўлиқ қўлланилганда таълим-тарбия фаолиятининг мукаммал тизими шакллантирилади.
Биз ушбу мақоламизда жисмоний тарбия дарсларида интерфаол ҳисобланган «Ақлий ҳужум» усулини қўллашни тавсия этамиз. Ақлий ҳужум – муаммоларни ҳал қилишда кенг қўлланиладиган анчагина мукаммал методдир. У қатнашчиларни ўз тасаввурлари ва ижодларидан фойдаланишга ундайди. У берилган ҳар қандай муаммога кўп сонли ечимлар топишда ёрдам беради (бу вазиятда мен нима қилишим керак? Бу тўсиқни қандай бартараф қилишимиз керак?).