Республика болалар ижтимоий мослашуви маркази

“Атрофдагилар билан ижобий муносабат ўрнатиш”

Машғулотда болаларга бадиий адабиётдаги қаҳрамонларнинг ҳаёти, уларнинг ўзгалар билан мулоқот қилишининг ижобий томонлари ҳақида сўзлаб берилади, мисоллар келтирилади. Флипчарт қоғозга одамлар билан мулоқот қилишнинг айрим томонлари ёзилади. (Масалан: табассум қилиш, жилмайиш, ширин сўзлаш, меҳрибонлик, диққат-эътиборли бўлиш, хушмуомалалик). Ўзгалар билан ўзи хоҳлагандек муносабатда бўлиш йўллари ҳақида мунозара юритилади.
“Саҳна кўриниши”. Ўқувчилар кичик гуруҳларга бўлинади ва ўзлари билган аския ёки қизиқарли воқеани саҳналаштирадилар. Тайёрланган воқеа саҳнада намойиш этилади. Ўқувчилар саҳна кўриниши бўйича ўз фикрларини билдирадилар.
Ҳар бир машғулотдан кейин янги ғоялар пайдо бўлиши мумкин. Машғулотлар баъзи ўқувчига ёқиши ёки ёқмаслиги мумкин. Шунинг учун ҳар бир машғулотни ўзига хос индивидуал усуллар асосида ўтказиш керак.
“Меҳрибонлик”. Иштирокчилар гуруҳ аъзосидан бирининг энг ижобий инсоний фазилатларидан фойдаланиб, мустақил тарзда ҳикоя тузадилар. Сарфланадиган вақт: 15 дақиқа.

ЎҚУВЧИЛАРДА ТАШКИЛОТЧИЛИК ВА ЕТАКЧИЛИК ҚОБИЛИЯТИНИ РИВОЖЛАНТИРИШ МАШҚЛАРИ

“Бошқанинг ҳолатини ўзингда ҳис эт”

Машқнинг мақсади: Муаммоли вазиятларда шахсдан мулоқот ўрнатиш хусусиятларини ижобий шакллантириш ва вазиятни бошқара олиш қобилиятларини ошириш.
Ўқувчилар давра бўлиб ўтиришади. Бошқарувчи кўрсатмасига биноан: “Ҳозир сиз жуфт-жуфт бўлиб ўйнайсиз (ўқитувчи ўқувчиларни бир-бирларига ёқишларини ҳисобга олиб жуфтларга бўлиб чиқади) машқни ким бошлашини ўзингиз ҳал қилинг”. Психолог бошловчи нимадандир хафа бўлган одамнинг қиёфасига киради. Шу ҳолатга киришлари учун ёмон бир ҳодиса, воқеани эслашга ҳаракат қилиши керак бўлади. Шериги эса хар хил йўллар билан бошловчини бу ҳолатдан чиқаришга ва ижобий ҳолатга келтиришга, яъни хурсанд қилишга, уни кулдиришга ҳаракат қилади. Лекин бу жараёнда қўл билан тегиш, жисмоний тегишга йўл қўйилмайди. Вазифа бажарилгандан кейин ролларингизни алмаштирасиз.