Reja: Kirish bob. Islom dinida oila masalalari

Reja:

Kirish

1.bob. Islom dinida oila masalalari

1.1.Islom dinida oila tushunchasi

1.2.Islom dinida oilaga munosabat

1.3.Islom dinida oila muqaddasligi

2.bob.Islom dinida oila ma’naviyati

2.1.Oilada ma’naviy munosabatlarning islomiy jihatlari

2.2.Islom dinida oiladagi farzand tarbiyasi va axloqiga e’tibor

2.3. Islom dinining oiladagi ma’naviy muhitini yaxshilashga ko‘rsatgan ta’siri.

Xulosa

Foydalanilgan adabiyotlar ro’yhati




Kirish

Kurs ishining dolzarbligi: Mustaqil O‘zbekistonda oila qadriyatlarining tiklanishi har bir oilaning iqtisodiy, madaniy, kasb-kor jihatdan ravnaq topishini anglatadi. Oila va oila munosabatlari hamisha davlatning diqqat-e’tibori va himoyasida bo‘lib kelmoqda.

Ma’lumki, oila ijtimoiy hodisa sifatida insoniyatning ulug’ kashfiyoti hisoblanadi. Prezident Islom Karimov ta’kidlaganidek : “Sharqda qadim-qadimdan oila muqaddas Vatan sanalgan. Chunki oila sog’lom va mustahkam bo‘lsa, mahallada tinchlik va hamjihatlikka erishiladi. Binobarin, mahalla-yurt mustahkam bo‘lsagina, davlatda osoyishtalik va barqarorlik hukm suradi. Zero, oila farovonligi – millat farovonligi asosidir” ¹ .

Asosiy Qomusimiz-Konstitutsiyamizda ham oila masalasiga alohida urg’u berilgan: “Oila jamiyatning asosiy bo‘g’inidir hamda jamiyat va davlat muhofazasida bo‘lish huquqiga ega” ².

Mamlakatimizda 2012-yil mustahkam oila yili deb e’lon qilindi. Shuningdek oila institutini rivojlantirish hamda takomillashtirishga qaratilgan “O‘zbekiston Respublikasining Oila kodeksiga o‘zgartirish va qo‘shimchalar kiritish to‘g’risida” O‘zbekiston Respublikasi qonuni loyihasi ishlab chiqildi.

Ushbu dasturga asosan, yosh oilalarga e’tibor va g’amxo‘rlikni kuchaytirish, ularni huquqiy va ijtimoiy himoyalashni ta’minlash, moddiy va ma’naviy jihatdan qo‘llab-quvvatlash, zarur imtiyoz va afzalliklar berish masalalari ko‘rib chiqildi.

Xalqimizning tarixini ko‘zdan kechirsak, oila va uning vazifalari, jamiyat taraqqiyotidagi o‘rni va salmoqli ishlari haqida qimmatli fikrlar aytilgan. O‘zbek oilasi tarixi va milliy pedagogikasi tarixi juda qadimiydir.

Ajdodlarimiz azaldan oila mustahkamligi sog’lom avlodning yaralishi yo‘lida muttasil e’tiborda bo‘lgan, oilasi, urug’i obro‘si mustahkamligi, g’ururi uchun doim kurashib kelgan. Bunday oilaparvarlar va bolaparvarlar islomiy g’oyalarining aynan bizning zaminda rivoj topgani bilan ham bog’liq. Buni tarixiy manbalarni kuzatishning o‘ziyoq anglatib turibdi. Islom dinining muqaddas kitobi “Qur’on” da oila, uning mustahkamligi, tarbiya masalalariga katta e’tibor berilgani uning isbotidir.

Demak, oila insonlarning tabiiy-biologik-fiziologik, moddiy-iqtisodiy, huquqiy-qonuniy, ma’naviy-axloqiy aloqa-munosabatlari asosiga qurilgan ijtimoiy birlikdan iboratdir. Insonlarning tabiiy biologik –fiziologik munosabati deganda jinsiy aloqa va nasl qoldirishni moddiy-iqtisodiy munosabatda – uy-ro‘zg’orni boshqarish, mulkiy munosabatni, huquqiy –qonuniy munosabat- nikohning qonuniyligini, ma’naviy-axloqiy munosabatda esa er-xotin inoqligi, pokligi, ota-ona bilan farzandlar o‘rtasidagi mehr-oqibat, hurmat, burch va shu kabilarni tushunish lozim. Hozirgi kunda yuqorida zikr etilgan oila va uning bilan bevosita bog`liq masalalar qonun yo‘li bilan muhofaza qilingan va kafolatlangan. Chunki u jamiyatning ajralmas bir bo‘lagidir. Bundan jamiyat oila dialektik birlikni tashkil qiladi degan mantiqiy xulosa kelib chiqadi.

Kurs ishining maqsadi: Islom dinida oila masalasiga asosiy tushuncha berish, islom dinida oilaga bo’lgan munosabatni tahlil qilib berish, islom dinida oilaga oldingi va hozirgi qarashlarni qiyosiy tahlil qilish, oila ma’naviyatini oshirishda dinning o’rni qanday ekanligini tushuntirish va bu borada izlangan, o’rgangan olimlarning asarlarini ko’rib chiqish.

Kurs ishining vazifalari:

• 
  Talaba yoshlarga oila tushunchasini diniy jihatdan tahlil qilib berish;
  
• 
  Oilani islom dinidagi o’rni haqida ta’rif va tavsif berish;
  
• 
  Oila ma’naviyatida dinning o’ziga xos o’rnini tushuntirib berish;
  
• 
  Oila ma’naviyati va islom dinining o’zaro aloqadorligi, nisbati va munosabatini yoritish;
  
• 
  Oila ma’naviyatini turli salbiy diniy qarashlardan himoya qilish va ulardan tiyilishni o’rgatish.
  

1^Karimov I.A. Yuksak ma’naviyat-yengilmas kuch. T., “Ma’naviyat”, 2008, 58-bet

2^O‘zbekiston Respublikasi Konstitutsiyasi. T., “Adolat”, 2008, 24-bet.