Режа: Жиноят ишлари бўйича процессуал ҳужжатлар фани тушунчаси

1-МАВЗУ: Жиноят ишлари бўйича процессуал ҳужжатлар фани тушунчаси, предмети ва тизими. Жиноят ишини қўзғатиш ва жиноят ишини қўзғатишни рад қилишда расмийлаштириладиган процессуал хужжатлар
Режа:

1. 
   Жиноят ишлари бўйича процессуал ҳужжатлар фани тушунчаси
   
2. 
   Жиноят ишини қўзғатиш ва жиноят ишини қўзғатишни рад қилиш асослари ва тартиби
   
3. 
   Жиноят ишини қўзғатиш ва жиноят ишини қўзғатишни рад қилишда расмийлаштириладиган процессуал хужжатлардан намуналар
   

Процессуал ҳужжатлар процессуал ва тергов ҳаракатларини қонунда белгиланган тартибда расмийлаштириш, процессуал шакл сифатида қонунда белгиланган талабларга жавоб бериши шартлигини ҳисобга олиб, қуйидаги талабларга жавоб бериши керак:
1. Процессуал ҳужжат уни тузишни назарда тутган қонун нормасига мос келиши керак. Бу талабга асосан:
а) процессуал ҳужжатнинг номи, шакли ва мазмуни мазкур ҳужжатни тузиш назарда тутилган қонун нормаларига тўғри келиши шарт;
б) Башарти қонунда процессуал ҳужжатнинг реквизити кўрсатилган бўлса, (масалан, 360-моддага асосан шахсни жиноят ишида гумон қилинувчи тариқасида иштирок этишга жалб қилиш тўғрисидаги қарор, 361-моддада кўзда тутилган шахсни жиноят ишида айбланувчи тариқасида иштирок этишга жалб қилиш тўғрисидаги қарор) процессуал ҳужжатлар шу реквизитларни ўзида акс эттириши лозим;
в) процессуал ҳужжатда унинг тузилиши назарда тутилган қонун нормасига ҳавола қилиниши лозим.
2. Процессуал ҳужжатнинг мазмуни иш бўйича аниқланган ҳақиқий ҳолатларга мос келиши зарур, яъни мазкур ҳужжатда ўз ечимини топадиган масалага тааллуқли, иш бўйича маълум ва аниқ-ланган ҳақиқий ҳолатлар тўла кўрсатилиши керак. Иш материалларида қарама-қаршиликлар мавжуд бўлмаслиги, процессуал ҳужжатда нима сабабларга асосан баъзи ҳолатлар асос деб қабул қилиниб, баъзилари рад этилганлигини кўрсатиш керак. Мазкур процессуал ҳужжатни тузиш зарурлиги иш ҳолатларидан келиб чиқиши ҳамда жиноят иши материалларида ўз ўрнини топиши лозим.