Рақс бадиий жамоаси билан ишлашда ўргатиш услубининг умумий масалалари

ИШ ҲИСОБОТИНИ ЁЗИШ ҚОИДАЛАРИ


Рақс жамоаларига тавсиф ёзиш
Ҳар бир ташкилот, муассаса ўз фаолиятини бошлаганда ўз дастури, иш режасига асосланиб ҳаракат қилади. Улар ўз фаолияти давомида маълум муддат ичида бажарилган ишлар ҳақида ҳисоботини ёзиб бориши лозим. Бу ҳисоботда дастур ёки режага киритилган барча вазифаларнинг бажарилганлиги ёки амалга ошмай қолган вазифаларнинг сабаблари, камчилик ва ютуқлар батафсил ёритилиши керак. Ҳисоботда ёзилган ҳар бир факт ўз исботига эга бўлиши керак. Берилган ҳисобот орқали ушбу ташкилот, идора муассасанинг иш жараёни ҳақида тўлиқ, маълумотга эга бўлиши ва керакли баҳо берилиши мумкин.
Ҳисоботда асосан 3 ойлик , 6 ойлик, 9 ойлик ва 1 йиллик иш фаолияти ёритилиши керак. Бадиий ҳаваскорлик рақс жамоасини оладиган бўлсак, балетмейстер Маданият уйи бош йўриқчисига ўз ҳисоботини тайёрлайди. Ҳисоботнинг "Кириш" қисмида давлатимиз сиёсати, маданият соҳасидаги янгиликлар, янги чиққан қарорлар ҳакида сўз юритилиб, шу қарорларнинг амалда тадбиқ этилгани, фойдали томонлари ҳақида ёзилади. Асосий қисмда эса ҳаваскорлик рақс жамоасининг иш фаолияти, ўтказилган тадбирлари, қатнашчилар сони, қилинган ишлар ҳақида ёзилиши керак.
Агар Марказлашган Маданият уйидаги бадиий ҳаваскорлик жамоалари раҳбарлари ҳисобот ёзса, шу туманга қарашли қишлоқ клублари, маданият уйлари қошидаги рақс жамоалари, уларга кўрсатилган услубий ёрдамлар ҳақида батафсил ёритилиши керак. Ҳисоботда ўтказилган кўрик-танловлар, уларнинг қатнашчилари, совриндорларининг исми-шарифи берилиши лозим. Бу тадбирлар қайси ташкилот билан биргаликда ўтганлиги, ўтказилган жойи, ҳомийлар, асосий ташкилотчилари ҳақида ҳам маълумот берилиши керак.
Ҳисоботнинг охирида камчиликлар батафсил ёритилиб, муаммоларни бартараф этиш тўғрисидаги фикрлари ҳам ёритилиши мумкин. Бундан ташқари, йиллик ҳисоботга кейинги йил учун тасдиқланган йиллик иш режаси ҳам қўшиб топширилади.
Ҳар бир тузилган рақс жамоасига тавсифнома ушбу муассаса томонидан ёзилади. Тавсифнома бирон-бир концерт дастурини намойиш этиш учун йўлланма олишда, "Халқ ансамбли" унвонини олишда, гастролларга чиқишдан олдин тегишли ташкилотларга топшириш учун берилади.
Тавсифномада рақс жамоаси ҳақида тўлиқ маълумот келтирилади: ташкил этилган жой номи, ташкил этилган йили, ансамбл номи, раҳбарининг исми-шарифи, қатнашчиларнинг сони, ансамбл репертуари, конкурсларда қатнашганлиги, олинган ўрин ва мукофотлари, концерт берган жойлари, унвони (бўлса агар), унвон берилган вақти.
Айни вақтда рақс жамоасининг аҳволи ҳақда ёзилади. Раҳбарият томонидан ёзма фикри баён этилади.