Радиоэлектроника асослари

Ярим ўтказгичли диодлар ва уларнинг классификацияси
(Р-n) ўтиш ҳодисаси асосида ишлайдиган энг содда ярим ўтказгичли асбоб ярим ўтказгичли диод дейилади. Биз юқорида кўрган (р-n) ўтишнинг вольт-ампер характеристикаси амалда ярим ўтказгичли диоднинг вольт-ампер характеристикасидир. Диодларни турли белгилари бўйича классификация қилинади. Масалан: у ясалган материали бўйича классификация қилинса: германий, кремний диодлари дейилади.
Белгиланган вазифаси бўйича: тўғриловчи, импульсли стабилитронлар, варикаплар ва бошқалар;
Улар ишини белгиловчи жараёнларнинг физик табиати бўйича: туннель, фотодиод, светодиод ва бошқалар;
Ўтиш соҳасининг тури бўйича: нуқтавий, ясси диодлар.
Бу ажратишлар ичида энг асосийлари бўлиб контакт соҳасининг кенглиги ва белгиланган вазифа бўйича ажратиш тури ҳисобланади.
Ярим ўтказгичли диодларнинг турлари
1. Нуқтавий диод
Нуқтавий диодларнинг контакт юзаси жуда кичик бўлади. Улар нуқтавий контактли пайвандлаш йўли билан ҳосил қилинади. n турдаги германий пластинкасига бериллийдан (баъзи ҳолларда индий билан қопланган) ясалган учли пружина пайвандланади. Пайвандлаш эса йиғилган диоддан қисқа импульсли тўғри ток (бир неча ампер тартибида) ўтказиш йўли билан бажарилади. (p-n) ўтиш соҳаси юзасининг кичкиналиги туфайли нуқтавий диодлар жуда кичик ўтиш сиғимига эга бўлади. Шунинг учун улар асосан юқори частотали қурилмаларда ишлатилади.
2. Ясси диодлар
Бундай диодлар (p-n) ўтиш сатҳининг анчагина катта ўлчамга эга бўлгани билан характерланиб, улар катта ток ва қувватларга мўлжалланган. Уларнинг ўтиш сиғими ҳам катта бўлади. Шунинг учун ясси диодлар 10 кГц гача бўлган частоталар соҳасида фойдаланилади. Улар кичик қувватли (1 Вт гача), ўрта қувватли (1 А гача ток ва 600 В гача кучланишга мўлжалланган), ва катта қувватли (2000 А гача токка мўлжалланган) бўлади.