Qurilishda marketing tushunchasi va mohiyati

Qurilishda marketing tadqiqotlari tushunchasi va mohiyati
Qurilishda marketing tadqiqoti - bu qurilish mahsulot va xizmatlar bozorida axborot to‘plash, uni tahlil qilish, bozordagi kompaniya ulushini prognozlash, marketing xizmatlarini sifatli yo‘lga qo‘yish, iste’molchilarni mijozga, vositachilarni doimiy biznes hamkorga yo‘naltiruvchi faoliyatdir. Marketing tadqiqoti yoki marketing axborot-tahliliy ta’minoti marketing faoliyatining ajralmas bir qismi va amaliy vositasidir. Marketing bozor manfaatlariga yo‘naltiriladi, u iste’molchilarning xohish-istaklari ustuvorligidan kelib chiqadi. Bunda xaridorlar talabi va motivatsiyasi xaqida, tovar bozorining salohiyati xaqida tasavvurga ega bo‘lishga yo‘naltirilgan faoliyat amalga oshiriladi. Raqobat sharoitida qurilish sohasidagi kompaniya bozorda yuzaga kelgan vaziyatni baholashga, bozorda iste’molchilarning ehtiyoj va talablarini, raqobatchilarning harakat usullari va imkoniyatlarini bilishiga ehtiyoji kattadir. Jumladan, bozor mexanizmining faoliyat ko‘rsatish qonuniyatlari va tendensiyalarini aniqlamasdan turib, bozor jarayonlarida faol ishtirok etish va bozor mexanizmi harakatlariga moslashish juda qiyin. Shuning uchun qurilish soha kompaniyalari maqsadli bozorlarda marketing tadqiqotlarini o‘tkazmasdan tijorat risk darajasini pasaytira olmaydi.
Marketing tadqiqotlari faoliyatining asosiy yo‘nalishlari qatoriga quyidagilarni kiritish mumkin: bozorni segmentlash, marketing rejalarini tuzish, marketingni tashkil etish, maqbul narxni shakllantirish, mahsulotni joylashtirish, yangi mahsulot ishlab chiqish (innovatsiya), mahsulotni iste’molchiga etkazib berish kabi yo‘nalishlar amalga oshiriladi.
Marketing tadqiqoti marketingning axborot ehtiyojlarini qondirishi ko‘zda tutilgan tadqiqotchilik faoliyati turini ifodalaydi. Marketingning asosiy talablaridan biri bozor «shaffofligi» va uning rivojlanishini «oldindan aytib berish mumkinligi»ni ta’minlash hisoblanadi. Shunday qilib, marketing tizimida marketing tadqiqoti o‘ziga xos bog‘lovchi bo‘g‘in rolida ishtirok etadi.
Marketing tadqiqotlarining maqsadlarini bilish katta ahamiyatga ega. Chunki maqsadni ko‘zda tutib vazifalar belgilanadi. Undan tashqari maqsad marketing sohasidagi ishlarning yo‘nalishi, ularning mazmunini ham aniqlash imkonini beradi. Marketing tadqiqotlarining maqsadi uning qaysi miqyosda ish olib borilishga qarab belgilanadi.