Qurilish materiallari

9.16-rasm. Asbosement listlar.


Ikkinchi guruhga quyidagi manzarali asbosement listlar kiradi: noorganik bog'lovchilar asosidagi kompozitsiyalar bilan bo'yalgan; sintetik emallar va bo'yoqlar bilan bo'yalgan; plyonkali materiallar bilan qoplangan. Ularni binolarning tashqi va ichki tomondan manzarali qoplashda, balkon va lojalarni to'sishda va boshqa joylarda ishlatish tavsiya etiladi.
Pogonajli asbosement buyumlar. Ularga uzunasiga o'lchovli buyumlar - shvellerlar, deraza tagi plitalari, to'kish elementlari, parapet qismlari va boshqa ekstruziya usulida olingan buyumlar kiradi. Shvellerlar devorbop plita va panellar karkaslarini tayyorlashda ishlatiladi.
Quvurlar. Asbosement asosida bosimli va bosimsiz quvurlar ishlab chiqariladi (9.17-rasm). Bosimli quvurlar 0,6-1,8 MPa bosimga mo'ljallangan bo'lib, BT6, BT9, BTI2, BTJ5 va BT18 klasslarda bo'ladi. Ular suv uzatish tizimlarida ishlatiladi. Quvurlar uzunligi 3 m dan 6 m gacha, diametri 100-500 mm. Bosimsiz quvurlar (BHT) neft va gaz uzatishda, kanalizatsiya, drenaj, chiqindilarni uzatish tizimlarida, telefon kabellarini yotqizishda, tutun va shamollatish kanallarida ishlatiladi. Asbosement gaz uzatish quvurlari gaz bosimi 0,5 MPa gacha bo`lgan tizimda ishlatiladi.





9.17-rasm. Asbosement quvurlar.


Gaz uzatish quvurlari ichki tomondan polipropilen, polietilen kabi termoplastik o'rama materiallar yoki epoksid, poliefir polimerlari asosidagi kompozitsion mastikalar bilan gaz o'tkazmaydigan qoplamali holda ishlab chiqariladi. Suv uzatish va kanalizatsiya quvurlari asbosement muftalar bilan birlashtiriladi.
Maxsus asbosement buyumlar. Asbosement asosida shamollatish va havoni tozalash tizimlarida ishlatiladigan qutilar (korobalar) tayyorlanadi. Qutilar yumaloq va to'g'ri to'rtburchak kesimli, bir biriga ulash maqsadida ikki tomoni yoki bir tomoni ochiq qilib tayyorlanadi. Qutilar uzunligi 300x300 mm gacha, devor qalinligi 10 mm o'lchamlarda bo'ladi.
Maxsus asbosement buyumlarga quyidagilar kiradi: quvur uzatish tizimlarini issiqlik izolatsiyasi qatlamini himoyalovchi yarimsilindrlar, elektr izolatsiyasi taxtalari, yozgi uylarni yopishda ishlatiladigan yirik o'lchamli (5 m gacha) ikki tomonga qiyali listlar va shu kabilar. Asbosement buyumlar ishlab chiqarishda hosil bo'ladigan (1-8%) chiqindilar ikkinchi marta kam miqdorlarda buyumlar tayyorlashda, ekstruziv usulda olinadigan pogonaj buyum­lar va mineral paxta tayyorlashda xomashyo sifatida ishlatiladi.