Qurilish materiallari

Akminit va akmigran plitalar kraxmal bog'lovchi asosida mineral paxta yoki shisha-paxtadan olingan granulalardan tayyorlanadi. Plitalar ishlab chiqarish texnologiyasi quyidagi asosiy jarayonlardan iborat: mineral paxtani granulalash, bog'lovchi moddani tayyorlash, bog'lovchi va granulalarni aralashtirib quyish massasini tayyorlash, buyumlarni qoliplash, quritish, bezash, jilvirlash, kolibrovkalash, bo'yash. Bog'lovchi tarkibi kraxmal, karboksilmetilselluloza, bentonit kukuni hamda gidrofob va antiseptik qo'shimchalardan iborat bo'ladi. Plitalar 300x300x20 mm o'lchamda ishlab chiqariladi. Ularning o'rtacha zichligi 320-360 kg/m³, tovush yutish koeffitsiyenti 0,2-0,8. Plitalarning o'ng tomoni nuragan ohaktosh ko'rinishiga o'xshatib bezak beriladi.
Akminit va akmigran plitalar nisbiy namligi 70% gacha bo'lgan jamoat binolarini kinokonsert zallari, ta'lim muassasi auditoriyalari ichki tomonidan shiftlarni va devorlarni qoplash uchun ishlatiladi. Plitalar metall profillar yordamida asosga tez va oson mahkamlanadi.
Yog'och tolali plitalar o'ng yuzasi yelimli yoki sintetik bo'yoqlar bilan pardozlanadi, perforatsiyalangan yoki ariqchalar ochilgan holda tayyorlanadi. Ular 1200x1200 mm dan 3000x1700 mm gacha, qalinligi 2-25 mm o'lchamlarda ishlab chiqariladi. Plitalarning o'rtacha zichligi 200-250 kg/m³, tovush yutish koeffitsiyenti kamida 0,3-0,4. Ular akustik va bezak materiallar sifatida jamoat hamda madaniy-maishiy binolar ichini pardozlash uchun ishlatiladi.
Gazsilikat beton asosida tovush yutuvchi plitalar va «Silakpor» tipidagi samarali plitkalar ishlab chiqariladi. «Silakpor»ning tovush yutish koeffitsiyenti 0,6-0,8, o'rtacha zichligi 350-500 kg/m³ atrofida, siqilishdagi mustahkamlik chegarasi 0,1 MPa.
Perforatsiyalangan akustik materiallarga mineral paxta, shisha-paxta to'shaklar, penopoliuretan asosidagi qoplamali buyumlar kiradi. Akustik material tashqi tomondan perforatsiyalangan po'lat listlar, gips plitalari va boshqa ekran hosil qiluvchi buyumlar bilan yopiladi. Ular gigiyena talablariga javob beradi, olovbardosh yoki qiyin yonadi, pardozbop, oson tozalanadi. Bunday akustik plitalar jamoat va madaniy-maishiy binolarning shiftlari va devorlarini bezash uchun ishlatiladi.