Qadimgi dunyo fizikasi

QADIMGI DUNYO FIZIKASI

Reja:Fizika faniga qachon, qayerda va qaysi olimlar tomonidan asos solindi. Demokritning atom nazariyasi. Aristotel - birinchi muallim. Mexanik harakat nazariyasining yuzaga kelishi. Mexanik moslamalar va uning jamiyat taraqqiyotidagi o’rni.

Tayanch so’zlar: atom, vakuum, deduksiya, lisey, Efir, kinematika, dinamika, vaznsizlik.

Inson paydo bo’lgandan boshlab yashash uchun kurashib keladi. Asta- sekinlik bilan dehqonchilik, chorvachilik va ov qilish uchun toshdan, bronza va temirdan ish qurollarini yasay boshlashdi. So’ngra shaharlar yuzaga kelib fan va madaniyat taraqqiy eta boshladi. Fan va madaniyatning ilk markazlari Mesopotamiya, Hindiston, O’rta Osiyo va Xitoy hisoblanadi. So’ngra fan va madaniyat markazi qadimgi Yunoniston (Gresiya)ga ko’chadi. Yunonistonda fan va madaniyat rivoji asosan uch davrga bo’linadi. Birinchi davr miloddan avvalgi VII-V asrlar-ioniylar fan va madaniyati, ikkinchi davr-miloddan avval IV-I asrlarni o’z ichiga olib, uni fan tarixida ellinlar davri ham deb yuritiladi. Uchinchi davr — eramizning I-VII asrlarini o’z ichiga olib, bu davr yunon-Rim davri deb ataladi. Ushbu davrlardagi fizika fanining taraqqiyotiga to’xtalamiz.