Qabul qiluvchi: kaf dots. Razzakov Q

Bioazot mikrobiologik preparati
O‘RFA Genetika va o‘simliklar eksprimental biologiyasi institutida azot o‘zlashtiruvchi Azotobacter chroococcum N1 shtammi asosida azotli o‘g‘itlar sarfini kamaytirish va qishloq xo‘jalik ekinlarining hosildorligini oshirishga imkon beradigan BIOAZOT-N biopreparati taklif etiladi.
BIOAZOT-N mikrobiologik preparati noana’naviy o‘g‘itlashda o‘simliklarning bargi orqali ham qo‘llash mumkin. Suspenziyalar qo‘llanilganda mineral o‘g‘itlar (asosan azotli) sarfi o‘rtacha 50% gacha kamaytiriladi.
Alohida ta’kidlash o‘rinliki, BIOAZOT-N mikrobiologik preparati barcha turdagi qishloq xo‘jalik ekinlariga qo‘llash mumkin. Suspenziya holidagi biopreparat 5 l/ga miqdorda qo‘llaniladi. Barg orqali noan’anaviy oziqlantirishda suspenziya miqdorini 10-15 l/ga gacha oshirish mumkin. Suspenziya qo‘llanayotganda shuningdek, normadagi azot miqdoridan kelib chiqqan holda 25% gacha mineral azot (karbamidga hisoblanganda) suspenziya tarkibida eritilgan holda qo‘llash mumkin. SHtamm suspenziyasi asosidagi biopreparatni o‘simlikning butun vegetatsiya davrida qo‘llash mumkin.
SHu o‘rinda tuproq unumdorligi haqida tushuncha hosil qilish maqsadga muvofiq hisoblanadi. Tuproqlarning o‘simliklarning me’yoriy o‘sishi va rivojlanishi uchun muhim ozuqa elementlari, namlik va havo bilan ta’minlay olish hususiyati tuproqlarning unumdorligini belgilovchi asosiy omillar hisoblanadi. O‘simliklarning o‘sishi va rivojlanishi uchun eng asosiy ozuqa elementlari azot (N), fosfor (P) va kaliy (K) hisoblanib, mineral o‘g‘itlar odatda ana shu elementlarning miqdoriga asoslanib qo‘llaniladi. SHuningdek, o‘simliklar rivojlanishida mikroelementlar – temir (Fe), mis (Cu), ruh (Zn), molibden (Mo), kalsiy (Ca), magniy (Mg), bor (B) kabi elementlar ham muhim o‘rin tutadi.
BIOAZOT-N mikrobiologik preparati qo‘llanilganda yuqorida sanab o‘tilgan makro- va mikroelementlarning tuproqlardagi harakatchanligi ortib, o‘simliklarga o‘zlashishi yaxshilanadi. Buning natijasida o‘simliklar hosildorligi yanada oshadi.
Bu mikrobiologik preparatni no‘xat o‘simligida mineral o‘g‘itlar o‘rniga qo‘llaganda nazoratga nisbatan don va dukkaklar soni ko‘payishi hisobiga hosildorlik 20-30 % ga ortadi.