Poyezdlar tuzish rejasini ishlab chiqish tartibi

Poyezdlarni tuzish rejasini ishlab chiqish, tasdiqlash va amalga kiritish tartibi. Poyezdlar tuzish rejasi texnologik hujjat bo‘lib, unda har bir poyezd tuzuvchi stansiya uchun poyezd manzillari (poyezd tarqatiladigan stansiya), tarkibdagi vagonlar guruhining manzillari, jo‘natiluvchi poyezdlarning turlari, tarkibdagi vagonlarning joylashish tartibi va bo‘sh vagonli poyezdlar uchun harakatdagi tarkibning turi ko‘rsatiladi.
Poyezdlar tuzish rejasini ishlab chiqishda quyidagi asosiy talablarga rioya etish kerak: yuklarni yetkazishni va vagonlar aylanmasini sezilarli darajada tezlashtirishga, texnik stansiyalararo saralash ishlarini to‘g‘ri taqsimlashga, vagonlarni poyezdlarga biriktirishga doir qayta ishlanishlar sonini kamaytirishga, ularning yig‘ilish va qayta ishlanishlar jarayonida turish vaqtini qisqartirishga, saralash va manyovr vositalaridan foydalanishni jadallashtirishga.
O‘zbekiston Respublikasi temir yo‘llaridan texnikaviy foydalanish qoidalari talablari:
209-band. Poyezdlar O‘zbekiston Respublikasi temir yo‘llaridan texnikaviy foydalanish qoidalari, harakatlanish grafigi va poyezdlarni tuzish rejasiga to‘liq muvofiq ravishda tuzilishi lozim. Yo‘nalishlar va har bir uchastka bo‘yicha yuk poyezdlarining og‘irligi va uzunligi me’yorlari poyezdlarning harakatlanish grafigi va tuzish rejasida belgilanib, lokomotiv turiga, poyezdlar harakatlanadigan uchastkalardagi yo‘l profiliga hamda, ushbu uchastkalarda joylashgan stansiyalarning qabul qilish-jo‘natish yo‘llarini foydali uzunligiga, elektrlashtirilgan liniyalarda esa - elektr ta’minoti sharoitiga mos bo‘lishi kerak.
254-band. Poyezdning to‘g‘ri tuzilishiga stansiya xodimlari javobgardirlar.
Stansiya xodimlari poyezdni jo‘natishdan avval stansiyaning texnologik ish jarayoni, texnikaviy-boshqaruv dalolatnomasi, harakat grafigi va poyezdlarni tuzish rejasiga muvofiq ravishda poyezdning to‘g‘ri tuzilganligi, ochiq harakat tarkibida yukning to‘g‘ri va mahkam o‘rnatilgani, bu yuklarning bus-butunligi to‘la ta’minlangani, poyezd o‘rnatilgan signallarga ega ekanligi va kerakli anjomlar bilan ta’minlanganini tekshirishlari kerak.