Pensiya ishi darslik i-qism toshkent-2020 Rustamov D. R., Tursunov J. P., Beknazarov Z. E

12.3. Pensiya miqdorini aniqlashda ish haqini hisoblab chiqish tartibi
Har qanday pensiyaning miqdori pensiyaga murojaat qilgan fuqaroning pensiyaga murojaat qilishdan oldin olgan o’rtacha oylik ish haqiga, ish stajining muddatiga bog’liq bo’ladi (7.2-rasm).
Pensiyaning tayanch miqdori. Yoshga doir to’liq pensiyaning tayanch miqdori pensiyani hisoblab chiqarish uchun olinadigan o’rtacha oylik ish haqining 55 foizi, lekin rasmiy belgilangan yoshga doir eng kam pensiyaning kamida 100 foizi (2018-yil 1-noyabrdan boshlab 396 500 so’m)⁷⁴ miqdorida olinadi.
Shuningdek, ish staji to’liq bo’lmagan chog’dagi pensiyalar bor stajga mutanosib miqdorda tayinlanadi hamda uning tayanch miqdori hisoblab chiqarish uchun olinadigan o’rtacha oylik ish haqining 55 foizi, lekin yoshga doir eng kam pensiyaning 50 foizi (2018-yil 1-noyabrdan boshlab 198 250 so’m) miqdorida olinadi.
Ish staji uchun pensiyaning oshirilishi. Pensiya tayinlashda talab etiladiganidan ortiqcha ish stajining har bir to’liq yili uchun pensiyalarning tayanch miqdorlari pensiyani hisoblab chiqarish uchun olinadigan o’rtacha oylik ish haqining 1 foizi miqdorida oshiriladi.
12.2-rasm. Yoshga doir pensiyaning tayanch miqdorini hisoblash tartibi
Pensiyaga qo’shiladigan ustama haqlar. Pensiyaning tayanch miqdori aniqlanib, ortiqcha ish staji uchun foizlar qo’shilganidan so’ng agar mavjud bo’lsa ustama haqlar tayinlanayotgan pensiyaning turidan qat’iy nazar qo’shib hisoblanadi.