“Педагогика” фанини ўқитиш бўйича ўқув-услубий мажмуа

Анкета (французча “текшириш”) методи ёрдамида педагогик кузатиш ва суҳбат жараёнида тўпланган далиллар бойитилади. Бу методи ҳам тизимланган саволлар асосида респондентлар билан мулоқотни ташкил этишга асосланади. Саволларга жавоблар, одатда, ёзма равишда олинади. Ўрганилаётган жараён моҳиятидан келиб чиққан ҳолда анкета саволлари қуйидагича бўлади: 1) очиқ турдаги саволлар (эркин, батафсил жавоб бериш учун имкон яратадиган саволлар); 2) ёпиқ турдаги саволлар (“ҳа”, “йўқ”, “қисман” ёки “ижобий”, “қониқарли”, “салбий” ва ҳоказо тарздаги жавоб вариантларини танлашга имкон берадиган саволлар).
Анкета методини қўллашда ҳам бир қатор шартларга амал қилиш зарур.

Интервью респондент томонидан тадқиқ этилаётган муаммонинг у ёки бу жиҳатини ёритувчи ҳодисага нисбатан муносабат билдирилишини таъминлайди. Интервью респондент эътиборига туркум саволларни ҳавола этиш асосида ўтказилади. Интервью жараёнида олинган саволларга нисбатан тадқиқотчи томонидан муносабат билдирилиши унинг самарасини оширади.
Таълим муассасаси ҳужжатларни таҳлил қилиш. Педагогик ҳодиса ва далилларни текшириш мақсадида таълим муассасалари фаолияти мазмунини ёритувчи маълумотларни текшириш мақсадга мувофиқдир. Таълим муассасаларида узлуксиз таълимни ташкил этишга оид ҳужжатлар талабларининг бажарилиш ҳолатини ўрганиш, эришилган ютуқ ҳамда йўл қўйилган камчиликларни аниқлаш, илғор тажрибаларни оммалаштириш ва таълим муассасаси педагогик тажрибасини ошириш мақсадида қўлланилади.


Тест методи респондентлар томонидан муайян фан соҳаси ёки фаолият (шу жумладан, касбий фаолият) бўйича ўзлаштирилган назарий билим ва амалий кўникма, малакалар даражасини аниқлашга хизмат қилади. Тест ўз моҳиятига кўра қуйидаги саволлардан иборат бўлади: 1) очиқ турдаги саволлар (батафсил жавоб бериш имконини берадиган саволлар); 2) ёпиқ турдаги саволлар (“ҳа” ёки “йўқ”, “ижобий” ёки “салбий” тарздаги жавобларга асосланадиган саволлар); 3) тўғри жавоб вариантлари қайд этилган саволлар (тўғри деб топилган жавоб варианти белгиланади).