Педагогика 5111800 Мактабгача таълим

Мавзу саволи	Биламан	Билдим
Билишни хоҳлайман
1.
2
3.
4.
5.
6.

5-илова
Экскурсия таълимни ташкил этиш шакли сифатида

Илк ва кичик гуруҳда экскурсия мактабгача таълим муассасасининг ичкарисида, ер майдончасида, ўрта гуруҳдан бошлаб муассасадан ташқарида ўтказила бошланади.

Экскурсия уюштиришни режалаштиришда қуйидаги жиҳатларни ҳисобга олиш лозим:
1) экскурсия нарса-ҳодисаларни дастлабки ёрқин, яхлит идрок этилишини таъминлаши керак;
2) болаларнинг таниш объект ёки ҳодисалар ҳақидаги тасаввурларини кенгайтириш, чуқурлаштириш, умумлаштириш учун такроран экскурсия уюштирилади. Такрорий экскурсия бола дастлабки экскурсия пайтида кузатган объект, ҳодисаларнинг янги сифат ва хусусиятларини очиб беришга хизмат қилади;
3) дастурий материални босқичма-босқич мураккаблаштириш икки йўналишда амалга оширилиши зарур: кузатилган ҳодисалар кўламини кенгайтириш ва у ёки бу ҳодисалар ҳақидаги билимларни кетма-кетликда чуқурлаштириш ва умумлаштириш;
4) ҳар бир экскурсияда таълимий ва тарбиявий вазифалар биргаликда ҳал этилиши лозим. Шунинг учун ўзлаштирилиши лозим бўлган билим ва кўникмалар ҳажмини режалаштириш ҳамда қандай ҳис-туйғу, муносабат, ахлоқий сифат, эстетик эҳтиёжларни фаоллаштириш аввалдан ўйланиши керак.
Экскурсия ўзаро бир-бири билан боғланган аниқ таркибий тузилишга эга: тайёрлов босқичи, экскурсиянинг бориши ва экскурсиядан кейин амалга ошириладиган иш.
Тайёрлов босқичи ҳам педагогни, ҳам болаларни экскурсияга тайёрлашни ўз ичига қамраб олади. Педагог экскурсия мавзусини, унинг мазмун-моҳиятини, ўтказилиш муддатини белгилайди. Шунингдек, экскурсия уюштириладиган объектнинг жойлашган ўрни ва ҳолатини ҳам кўздан кечиради. Экскурсия давомида бериладиган намунавий саволларни тузади, шеър, мақол ва топишмоқлардан намуналар танлайди.