Loyiha O‘zbekiston respublikasi adliya vazirligi toshkent davlat yuridik universiteti

E’tibor qiling! 
Tanib olish uchun ko‘rsatishni o‘tkazishga 
tayyorgarlik ko‘rishni 
rejalashtirish
chog‘ida quyidagilarni nazarda 
tutish lozim: tanib olish uchun ko‘rsatishning maqsadi; tanib oluvchini 
tanib olish lozim bo‘lgan shaxs yoki narsaning belgilari, alomatlari, 
xususiyatlari to‘g‘risida oldindan so‘roq qilish; tanib olish uchun 
ko‘rsatishni o‘tkazish to‘g‘risida qaror qabul qilish; tanib oluvchini 
psixologik jihatdan tayyorlash; qidirilayotgan shaxs (narsa) bilan birga 
ko‘rsatiladigan ob’ektlarni tanlash; tergov harakati o‘tkaziladigan joy 
va vaqtni belgilash; xolislarni taklif qilish, tanib olish uchun ko‘rsatish 
jarayoni va uning natijalarini qayd etish uchun zaruriy texnik-
kriminalistik vositalarni tayyorlash.

---

299 
Agar kuzatish yuz bergan paytdan boshlab oradan uzoq vaqt o‘tgan 
bo‘lsa, tabiiy jarayonlar tufayli qidirilayotgan sub’ektning tashqi 
ko‘rinishida yuz berishi, shuningdek sun’iy yo‘l bilan kiritilishi (sochni 
bo‘yash, soqol, mo‘ylovni qirib tashash va sh.k.) mumkin bo‘lgan 
o‘zgarishlarni hisobga olish zarur.
Malakali o‘tkazilgan birinchi so‘roq tanib oluvchini tanib olish 
uchun ko‘rsatishni o‘tkazishdan oldin qayta so‘roq qilmaslik imkonini 
beradi. Agar ob’ektning o‘ziga xos belgilari etarli darajada to‘liq 
aniqlangan va qayd etilgan bo‘lmasa, tanib oluvchini yana bir marta 
so‘roq qilish va yo‘l qo‘yilgan bo‘shliqlarni to‘ldirish tavsiya etiladi. 
Bunday so‘roq qilish tanib oluvchi sub’ekt tashqi ko‘rinishining ilgari 
uning xotirasidan ko‘tarilgan alohida belgilarini eslaganini bildirgan 
hollarda ham o‘tkazilishi zarur. 
So‘roq qilinuvchini bo‘lg‘usi tanib olish uchun ko‘rsatishga 
psixologik jihatdan tayyorlash juda muhim (ayniqsa u asosli ravishda 
hayiqadigan sub’ekt ko‘rsatilgan holda). Odatda tayyorlash suhbat 
xususiyatiga ega bo‘ladi. Bunday suhbat jarayonida tergovchi ko‘rilgan 
xavfsizlik choralarini, mazkur tergov harakatini o‘tkazish tartibini 
tushuntiradi. So‘roq qilinuvchi tergovni qiziqtirayotgan ob’ektni 
kuzatgan holatlarni aniqlayotganda, uni kuzatish sharoitlari (qaerda, 
qachon, kechasi yoki kunduzi, kuzatuvchining o‘sha paytdagi ruhiy va 
jismoniy holati va h.k.)ga aniqlik kiritish zarur.