Илмий фаолиятга тайёргарлик асослари

Тадқиқот мавзуининг долзарблиги. Ушбу ишнинг Ўзбекистон учун амалий 
жиҳатдан долзарблиги, биринчидан, тобора чуқурлашиб бораётган, бутун дунёда юз 
бераётган халқаро интеграция ва глобаллашув жараёнлари билан боғлиқдир. 
Ўзбекистон ана шундай жараёнларнинг таркибий қисми бўлиши, жаҳон бозорида 
ўзининг муносиб ўрнини эгаллаши керак.
Муаммонинг илмий ишлаб чиқилиши даражаси. Ривожланган бозор 
иқтисодиётига эга чет мамлакатларнинг қуйидаги каби бир қатор иқтисодчилари ўтиш 
иқтисодиётига эга мамлакатларнинг ташқи иқтисодий сиёсати муаммолари билан 
шуғулланишмоқда: П.Линдерт, Р.Помфрет, М.Портер, Дж.Деверюкс, Б.Роберте, 
П.Ромер, Д.Сакс ва бошқалар. МДҲга аъзо мамлакатларда бундай муаммоларнинг 
айрим жиҳатлари устида В.Дерманов, С.Дубинин, А.Терехов, Н.Шмелев, С.Жуков ва 
бошқалар иш олиб боришмоқда. Ўзбекистонда ташқи иқтисодий фаолият, ташқи 
савдони ривожлантириш ва республиканинг халқаро ҳамжамиятга интеграциясига 
бағишланган тадқиқотлар А.Алимов, А.Бедринцев, А.Бекмуродов, Д.Жалолов, 
Г.Назарова, Т.Нуруллаев, А.Расулев, Н.Сирожиддинов, З.Адилова, А.Юсупов ва бошқа 
олимлар ва амалиётчиларнинг илмий асарларида ўз аксини топган.
Тадқиқот объекти. Ушбу ишда жаҳон бозорларига фаол кириб бораётган 
Ўзбекистон Республикасининг ташқи иқтисодий фаолияти тадқиқот объекти қилиб 
олинган.
Тадқиқотнинг мақсадлари ва вазифалари. Жаҳон иқтисодиётининг тобора 
кучайиб бораётган глобаллашуви ва Ўзбекистон Республикасининг жаҳон хўжалигига 
интеграцияси шароитида халқаро савдода юз бераётган тенденциялар ва жорий 
жараёнлар таҳлили тадқиқот мақсадини ташкил этади. Тадқиқотнинг вазифаси умуман 
республика бўйича ва минтақавий ҳамда тармоқлар бўйича ташқи савдо соҳасидаги 
жорий вазият таҳлили, шунингдек, Ўзбекистоннинг минтақавий ташқи иқтисодий 
сиёсатини шакллантиришнинг стратегик жиҳатларини белгилашдан иборат. 
Тақдим этилган ишнинг илмий янгилиги Ўзбекистон Республикасининг ташқи 
иқтисодий ва интеграцион алоқаларидаги минтақавий-мамлакатларга оид устувор 
йўналишларни, экспортни кенгайтириш, мамлакатда сифатли, рақобатбардош 
маҳсулотларни ишлаб чиқаришнинг роли ва ўрнини белгилашдан иборат.