Ўзбекистон республикаси олий ва ўрта махсус таълим вазирлиги наманган муҳандислик-қурилиш институти

Оддий ҳукмнинг таркиби, унинг турлари. Ҳукм эга (S) ва кесим 
(P) ҳамда боғловчилардан ташкил топади. Ҳукм субъекти фикримиздаги 
нарсани билдиради. Шунинг учун ҳукмдаги фикр нимага қаратилган бўлса, 
ўша унинг субъекти ҳисобланади. S – P дир. 
«Мантиқ - тўғри тафаккур шакли ва қонунларини ўрганадиган фандир». 
Ҳукм предмети тўғрисида тасдиқ ёки инкор қилиб айтилган қисми 
предикат дейилади. Боғловчи S ва P ўртасидаги алоқани ифодалайди. 
(«дир», «эмас»)
S – P дир (тасдиқ ҳукм). «Барча талабалар ёшлардир». 
S – P эмас (инкор ҳукм). «Баъзи ёшлар талаба эмас». 
Тасдиқ ҳукмда бирор белгининг нарсада мавжудлиги кўрсатилади. 
Инкор ҳукмда бирор белгининг шу нарсада мавжудлиги рад этилади. 
Ҳукмлар миқдор жиҳатдан умумий, жузъий ва якка ҳукмга бўлинади. 
Умумий ҳукм – нарсалар ва уларнинг хусусиятларини тўлалигича 
акс эттиради. Ҳамма S – P дир. 
«Барча металлар электр ўтказувчанлик хусусиятига эгадир». 
Агар ҳукм нарсаларнинг хусусиятларини бир қисмини акс эттирса
жузъий ҳукмлар дейилади. Баъзи S – P дир. «Баъзи ёшлар тадбиркордир». 
Агар ҳукм нарса ва ҳодисаларнинг айрим, якка хусусиятларини акс 
эттирса якка ҳукмлар дейилади. 
«Ислом Каримов – Ўзбекистон Республикаси 1-Президентидир». 
Ҳукмлар миқдор ва сифат жиҳатидан бирлаштирилса, қуйидаги
ҳукмлар ҳосил бўлади: 
а) умумий тасдиқ (миқдор жиҳатдан умумий, сифат жиҳатдан 
тасдиқ) Ҳамма S – P дир. «Ҳамма талабалар фалсафа фанини ўрганади». 
б) жузъий тасдиқ (миқдор жиҳатдан қисман, сифат жиҳатдан тасдиқ)
Баъзи S – P дир. «Баъзи ҳашаротлар уча оладилар». 
в) умумий инкор (миқдор жиҳатдан умумий, сифат жиҳатдан инкор)
Ҳеч бир S – P эмас. «Ҳеч бир сахий хасис эмас». 
г) жузъий инкор (миқдор жиҳатдан қисман, сифат жиҳатдан инкор)
Баъзи S – P эмас. «Баъзи файласуфлар идеалист эмас».
Ҳукмлар латин ҳарфларида ифодаланади.