1-мавзу. Кириш. Ўзбекистон тарихи фани предмети, уни ўрганишнинг назарий-методологик асослари, манбалари ва аҳамияти

Ўзбекистон тарихини ўқитишнинг аҳамияти 
Тараққий этган миллатларнинг ўз тарихини яхши билиши ва қадрлаши, 
тарихий ёдгорлик ва обидаларини эъзозлаши кўз қорачиғидек асрашининг 
кўпгина сабаблари бор. Бу энг аввало, тарих инсоният пайдо бўлганидан то 
ҳозиргача давом этиб келаётган ижтимоий жараён ойнаси эканлиги билан 
боғлиқдир. Иккинчидан эса, бутун инсоният шу тарихга қараб, ўз ўтмиши ва 
борлигини англайди, келажак режаларини белгилайди.
Ўтган чоракам бир асрлик коммунистик мустамлака даврида 
Ўзбекистон тарихи таҳқирланди, сохталаштирилди, халқ таълими соҳасида 
ўқитиладиган фанлар тизимига фан сифатида киритилмади. Бундан асосий 
мақсад халқимизда ўз ўтмишига нисбатан нафрат руҳини тарбиялаш ва 
тескари тарихий хотирани шакллантиришдан иборат бўлди.
Ўзбекистон ҳукумати мустақилликдан сўнг Ўзбекистон тарихи ҳақида 
одилона сиёсат юритди. Унинг миллат маънавияти ва мафкураси, халқ 
таълимида тутган ўрнига юксак баҳо бериб, уни давлат сиёсатининг устивор 
йўналишларидан бири даражасига кўтарди. 
Ўзбекистон тарихи - ҳозирги буюк ва муқаддас Истиқлолимиз ила бир
ярим асрлик мустамлакачилик ғафлат уйқусидан кўз очиб уйғонган халқимиз 
истиқболимизни белгилашда, замонавий мутахассис кадрларни тайёрлашда 
энг зарурий дастуриламалдир. 
Умуман, Она тарихни ўқитиш ва ўрганиш ҳозирда авж олиб 
ривожланаётган ислоҳотчилик ва янгиланиш ҳаракати даврида ижтимоий 
заруриятгина эмас, балки ҳаётий эҳтиёжга айланган. Бу эҳтиёж миллий
маънавий-мафкуравий уйғониш, маданий ва иқтисодий юксалишларга 
бўлган эҳтиёжларнинг бош мезони ҳисобланади. Тарихга бўлган миллат 
эҳтиёжнинг қондирилиши тараққиёт ва миллий уйғонишнинг асосидир. 
Ҳаққоний ёзилган Ўзбекистон тарихини ўрганиш ва ўқитиш шунинг 
учун ҳам керакки, у сохта тарихий тушунча ва тарихий хотирасизликка 
барҳам беради, миллий ғоя ва мафкура такомиллашувини тезлаштиради. 
Ўзбекистон тарихини ўқитиш ва ўрганиш яна шунинг учун ҳам зарурки, 
халқимиз ундан руҳий қувват олиб, душманга бош эгмаслик, қайта 
мустамлака қопқонига тушмаслик, бошқаларга бўйсинмаслик, бегона ғоя ва 
мафкура ҳамда зуғумлар таъсирига берилмаслик маънавиятига эга бўлади. 
Тарихни мукаммал билиш, унинг мазмун ва моҳияти, фалсафасини теран 
англаш миллат учун юксак фазилат.