O’zbtkiston respublikasi oliy va o’rta maxsus ta’lim vazirligi

Murabbiyning ijodiy qobiliyati. Bu – murabbiy kasbiy o‘sishining birinchi shartidir. Kasbiy vazifalarni ijodiy usulda yechishga
qobiliyatlilik – murabbiy irodasining muhim tarkibiy qismidir. Ijodiy yondashuvsiz, kashfiyotlarsiz, yaratuvchanliksiz, olingan bilimlarni amaliyotda qo‘llay olmaslik jiddiy yutuqlarga yetaklamaydi.
Ijodiy yondashuv orqali murabbiyning boshqa qobiliyatlari ham namoyon bo‘ladi, mehnat samaradorligi oshadi. Ishga ijodiy munosabat, o‘quv-mashq jarayoni vazifalarini hal etishda samarali yo‘llarni tinimsiz izlash murabbiyning shaxsiy va kasbiy faoliyatining kuchayishiga olib keladi. Qiziqishlar bo‘yicha tanlanuvchi, fikrlab qilingan ijodiy mehnat jarayonida organizmning barcha funksional tizimlari eng samarali ravishda shakllanadi, bu inson genetik dasturini ro‘yobga chiqarishning asosiy yo‘lidir.
Murabbiyning san’atkorlik (artistlik) qobiliyati. Murabbiy uchun kasbiy faoliyatida san’atkorlik (artistlik) qobiliyati katta yordam beradi. San’atkorlikka ega odam doimo ishonarli, yorqin, isbotlangan va qiziqarli harakatlarni amalga oshiradi. Nutqni emotsional bezash, urg‘ularni o‘z o‘rniga qo‘ya olish, murabbiy so‘zlarining salmoqli, aniq, tushunarli, hatto “ko‘rgazmali” bo‘lishini ta’minlaydi. Bunday hollarda ma’lumot faqat so‘zlar bilan ifodalanmaydi, balki ifodali mimika va harakatlarida ham namoyon bo‘ladi.
Ma’lumki, “dunyo teatr, odamlar esa aktyorlardir”, murabbiylar ham, o‘yinchilar ham muloqot jarayonida sotsial rollarini o‘ynaydilar. Rollar qanchalik aniq, ishonarli va ustalik bilan bajarilsa, muloqotning vazifalari shunchalik to‘liqroq amalga oshadi.
Adabiyotlarda san’atkorlikdan samarali foydalanishga misol sifatida, Napoleonning qobiliyatlari keltiriladi. U o‘z qo‘mondonlariga g‘azabini sochmoqchi bo‘lganida butun boshli minispektallar o‘ynagan va buni yuksak iqtidor bilan bajargan. Harbiy kengashda u o‘zini “yonib-tutash” darajasigacha olib borgan, emotsiya avjida o‘zidagi uchburchak nishonlarni, kiyimlarni yulib olgan, polga tashlab tepkilagan, o‘z qo‘l ostidagilardan noroziligini qattiq so‘zlarda ifodalagan. Harbiy kengashdan so‘ng esa yordamchisi Napoleon ushbu “mashg‘ulot” oldidan buyurtma berib qo‘ygan uchburchak belgilarning yangisini darhol olib kelib bergan.