O’zbekistonning mustaqillik davri tarixi fanidan o’quv – uslubiy majmua

Birinchidan, boshqaruvning butun mexanizmi shaxs va kollektivning moddiy manfaatdorligi qoidalariga asoslanishi, sug’orish zonalarida aholi zich joylashganligi, bu joylarda yer tanqisligi, bunday joylarga yerning xususiy mulk sifatida bo’lib berish katta fojeaga olib kelishi mumkinligi xususida fikr yuritildi.
Ikkinchidan, O’zbekistonda sug’oriladigan dehqonchilik mavjud, dehqonchilik yer-suv kompleksi bilan bog’liq. Yerni ana shunday kompleksdan ajratib yerni xususiylashtirib bo’lmaydi.
Uchinchidan, O’zbekistonda asosiy fondlar suv xo’jaligi vositalar, mashina, traktorlar, chorvachilik komplekslari asosida shakllanganki, ularni yakka xo’jaliklarga bo’lib berish mumkin emasligini ta’kidladi.
To’rtinchidan, qishloq xo’jalik sohasi uning tarmoqlarini yangi ish uslublariga o’tkazish uchun olib borilayotgan islohotlarning maqsadi dehqonlarning o’z ishidan manfaatdorligini oshirish, ularning turmush darajasini saviyasini ko’tarishdan iborat ekanligi xususida bo’ldi. «Dehqon boy bo’lmasdan-ishchi ham, ziyoli ham to’q bo’lishi mumkin emas, xalqimizning, el-yurtimizning, hayotini, kelajagini farovon qilib bo’lmaydi»,-deya dehqon xo’jaliklarining faoliyatini yanada oshirish xususida tavsiyalar berdi. Buning uchun rahbarlikning ma’muriy buyruqbozlikka asoslangan usullardan voz kechish, ijara kooperativ usuliga o’tish, oila va ijara asosida ish yuritish zarurligini uqtirdi.
Davlat rahbari dehqonlarning farovon yashashini ta’minlash, ularning daromadini ko’paytirish manbalari xususida to’xtalib, birinchi manbai qishloq ahlining ish haqini oshirish, mahsulot tan narxini kamaytirish, ikkinchi manbai qishloqdagi ijtimoiy muammolarni zudlik bilan hal etish, buning uchun bolalar bog’chalari, shifoxonalar qurish, kommunal va maishiy xizmat tarmog’ini kengaytirish, uchinchi manbai shaxsiy tomorqalarni kengaytirishdan iboratligini alohida ta’kidladi. Shundan so’ng Prezident I.Karimov «Shaxsiy tomorqa xo’jaliklarining egalari bo’lmish dehqonlarga moliyaviy yordam beri shva ularning uyushmasi, moddiy-texnik bazasini mustahkamlash to’g’risida» qabul qilingan Farmonning mazmun-mohiyatini tushuntirib o’tdi.
Ma’ruzada xorijiy mamlakatlarda jumladan, Frantsiya va Shvetsiyaning qo’shma korxonalarida paxtani qayta ishlashning besh bosqichdan iborat yangi usuli qo’llanilayotganligi, ana shu usulni O’zbekiston hududida ham amalga oshirish mumkinligi xususida tavsiyalar berildi. Aholini ichimlik suvi bilan ta’minlash, qishloqlardagi xonadonlarni gazlashtirish masalalarining ham yechimlari ko’rsatib berildi. «Paxta ishi» bilan nohaq qamalganlarni ozod qilish, kelajakda bunday nohaqliklar, adolatsizliklar takrorlanmasligi uchun kurashish zarur ekanligiga alohida e’tiborini qaratildi.