O‘zbekiston Respublikasining Iqtisodiy protsessual kodeksi

36-modda. Bankrotlik to‘g‘risidagi ishlarning sudlovga tegishliligi
Yuridik shaxslar va fuqarolarning bankrotligi to‘g‘risidagi ishlar qarzdor davlat ro‘yxatidan o‘tgan joydagi sudda ko‘riladi.
LexUZ sharhi
Qarang: O‘zbekiston Respublikasi “Bankrotlik to‘g‘risida”gi Qonunining 5, 35, 45-moddalari, mazkur Kodeksning 210-moddasi.
37-modda. Alohida sudlovga tegishlilik
Ko‘chmas mulkka bo‘lgan mulk huquqini tan olish to‘g‘risidagi da’volar, ko‘chmas mulk haqidagi nizolar, shu jumladan ko‘chmas mulkni boshqa shaxsning g‘ayriqonuniy egaligidan talab qilib olish to‘g‘risidagi yoxud mulkdorning yoki mol-mulkning boshqa qonuniy egasining huquqlari egalik qilishdan mahrum etish bilan bog‘liq bo‘lmagan holda buzilishini bartaraf etish haqidagi va ko‘chmas mulkka bo‘lgan huquqlar to‘g‘risidagi boshqa da’volar ko‘chmas mulk joylashgan erdagi sudga taqdim etiladi.
LexUZ sharhi
Qarang: mazkur Kodeksning 206 — 209-moddalari.
Tashuvchiga nisbatan yo‘lovchilar, bagaj va yuklarni tashish shartnomalaridan kelib chiqadigan da’volar, shu jumladan, agar javobgarlardan biri tashuvchi bo‘lsa, transport tashkilotining organi joylashgan erdagi sudga taqdim etiladi.
Hakamlik sudining hal qiluv qarorini bekor qilish to‘g‘risidagi ariza hakamlik sudi joylashgan erdagi iqtisodiy sudga beriladi.
LexUZ sharhi
Qarang: mazkur Kodeks 224-moddasi ikkinchi qismining 3-bandi.
Hakamlik sudida ko‘rilayotgan da’voni ta’minlash choralarini ko‘rish to‘g‘risidagi, shuningdek hakamlik sudining hal qiluv qarorini majburiy ijro etish uchun ijro varaqasi berish to‘g‘risidagi ariza hakamlik sudi joylashgan erdagi yoki qarzdor davlat ro‘yxatidan o‘tgan joydagi yoxud agar qarzdor davlat ro‘yxatidan o‘tgan joy noma’lum bo‘lsa, uning mol-mulki turgan joydagi iqtisodiy sudga beriladi.
LexUZ sharhi
Qarang: mazkur Kodeksning 229-moddasi ikkinchi qismining 3-bandi.
Korporativ nizolar bo‘yicha da’volar ushbu Kodeksning 30-moddasida ko‘rsatilgan yuridik shaxs joylashgan erdagi sudga taqdim etiladi.
Qarshi da’volar dastlabki da’vo ko‘rilayotgan joydagi sudga taqdim etiladi.