O‘zbekiston Respublikasining Iqtisodiy protsessual kodeksi

30-bob. Yo‘qolgan sud ishini va ijro ishini yuritishni tiklash to‘g‘risidagi ishlarni yuritish
233-modda. Yo‘qolgan sud ishini yoki ijro ishini yuritishni tiklash tartibi
Iqtisodiy ish bo‘yicha yo‘qolgan sud ishini yoki ijro ishini yuritish ishda ishtirok etuvchi shaxslarning, prokurorning, davlat ijrochisining arizasiga, shuningdek sudning tashabbusiga ko‘ra sud tomonidan tiklanishi mumkin.
Yo‘qolgan sud ishi yoki ijro ishini yuritish to‘liq tiklanadi yoxud uning sud fikriga ko‘ra tiklanishi zarur bo‘lgan qismi tiklanadi. Sudning hal qiluv qarori yoki ish yuritishni tugatish to‘g‘risidagi ajrimi, agar ular ish yuzasidan chiqarilgan bo‘lsa, albatta tiklanishi shart.
Arizachi yo‘qolgan sud ishini yoki ijro ishini yuritishni tiklash to‘g‘risidagi ishni ko‘rishda sud tomonidan sarf qilingan sud xarajatlarini to‘lashdan ozod qilinadi. Bila turib yolg‘on ariza berilgan bo‘lsa, sud xarajatlari arizachidan undirib olinadi.
LexUZ sharhi
Qarang: Mazkur Kodeksning 234 — 238-moddalari.
234-modda. Yo‘qolgan sud ishini yoki ijro ishini yuritishni tiklash to‘g‘risida ariza berish
Yo‘qolgan sud ishini yuritishni tiklash to‘g‘risidagi ariza ishni ko‘rgan sudga, yo‘qolgan ijro ishini yuritishni tiklash to‘g‘risidagi ariza esa ijro etish joyidagi sudga beriladi va tegishli sud tomonidan ko‘rib chiqiladi.
Arizada ish to‘g‘risidagi batafsil ma’lumotlar ko‘rsatilishi kerak. Arizachida saqlanib qolgan va ishga daxldor bo‘lgan hujjatlar yoki ularning ko‘chirma nusxalari, garchi ular belgilangan tartibda tasdiqlanmagan bo‘lsa ham, arizaga ilova qilinadi.
LexUZ sharhi
Qarang: Mazkur Kodeksning 233, 235 — 238-moddalari.
235-modda. Yo‘qolgan sud ishini yoki ijro ishini yuritishni tiklash to‘g‘risidagi arizani ko‘rib chiqish
Iqtisodiy sud yo‘qolgan sud ishini yoki ijro ishini yuritishni tiklash to‘g‘risidagi ishni ko‘rishda ishning saqlanib qolgan qismidan, ish yo‘qolguniga qadar undan yuridik shaxslar va fuqarolarga olib berilgan hujjatlardan, bu hujjatlarning ko‘chirma nusxalaridan, shuningdek ishga daxldor bo‘lgan boshqa hujjatlardan foydalanadi.
Sud protsessual harakatlarni bajarish chog‘ida hozir bo‘lgan shaxslarni, sud qarorini ijro etgan shaxslarni, zarur hollarda esa, yo‘qolgan sud ishini yoki ijro ishini ko‘rgan sud tarkibiga kirgan shaxslarni ham guvoh sifatida so‘roq qilishi mumkin.
LexUZ sharhi
Qarang: Mazkur Kodeksning 233-234, 236 — 238-moddalari.