O‘zbekiston respublikasida kasbiy malakalar, bilim va ko‘nikmalarni rivojlantirish milliy tizimi faoliyatini tashkil etish choralari to‘G‘risida

2-bob. Milliy malakalar ramkasining tuzilishi

5. Milliy malakalar ramkasi Yevropa malakalar ramkasiga va O‘zbekiston Respublikasining “Ta’lim to‘g‘risida”gi Qonuniga mos bo‘lgan sakkizta malaka darajasini, shuningdek, mos malakalar darajalariga erishishning asosiy yo‘llarini ilovaga muvofiq o‘z ichiga olgan.

6. Milliy malakalar ramkasi jadval ko‘rinishidagi konstruksiya bo‘lib, unda har bir malaka darajasi bo‘yicha kasb faoliyatini amalga oshirish uchun talab qilinadigan bilimlar, mahorat va ko‘nikma, shaxsiy va kasbiy kompetensiyalar, shuningdek, tegishli malaka darajasini egallash yo‘llari belgilanadi, aynan:

1) bilimlar — kasbiy faoliyatning quyidagi xususiyatlarini aks ettiradi:

a) foydalanilayotgan axborotning hajmi va murakkabligi;

b) bilimlarning innovatsiyaviyligi;

v) nazariy va amaliy bilimlar nisbati.

2) mahorat va ko‘nikmalar — quyidagi ko‘rsatkichlar bilan ifodalanadi:

a) kasb vazifalarini bajarishning variantliligi, vazifalarni hal qilish variantlarini tanlash zarurati va uning yo‘llarini ishlab chiqish;

b) ish holatining noaniqligi va uning rivojlanishini oldindan aniqlash imkoni yo‘qligi;

3) kompetensiyalar quyidagi ko‘rsatkichlar bilan ifodalanadi:

a) rahbarlik ostidagi faoliyat;

b) mustaqil ijro intizomi;

v) rahbarlik faoliyati;

g) faoliyat ko‘lami — vakolat va mas’uliyatning kengligi, kasbiy faoliyatdagi mumkin bo‘lgan xatoning oqibatlari;

4) malakani egallash yo‘llari O‘zbekiston Respublikasi qonunchiligida belgilangan ta’lim darajalari bilan ifodalanadi.

7. Milliy malakalar ramkasi asosida davlat boshqaruvi organlari va xo‘jalik birlashmalari ish beruvchilar birlashmalari bilan hamkorlikda tarmoqlar malaka ramkalarini ishlab chiqadi va tasdiqlaydi, tegishli malaka darajalarining o‘ziga xos xususiyatlarini aks ettiruvchi kasb standartlarini ishlab chiqadi.

8. Malaka muayyan ta’lim dasturi va/yoki amaliy tajriba natijasi hisoblanadi. Malakaning o‘zgarishi va darajasining o‘sishi, odatda, tegishli litsenziyaga ega bo‘lgan muassasalarda malaka oshirish, kadrlarni qayta tayyorlash va qo‘shimcha ta’lim berish tizimining qo‘shimcha o‘qitish dasturlari bo‘yicha o‘qitish natijasi hisoblanadi.

Ta’lim va o‘qitishning turli ko‘rinishlari tarmoqlar, malakalar tizimlarida hisobga olinadi.