O‘zbekiston respublikasi xalq ta'limi vazirligi respublika ta'lim markazi

ОЗОД ДИЁР

Шукур Саъдулла

Яшна, озод диёрим,

Ўзингсан меҳрибоним!

Бахт-саодат йўлида

Хизмат қилмоқ шиорим:

Далаларинг боғистон,

Тошлоқларинг тоғистон.

Чинин айтсам ўзингсан –

Мангу чаман, гулистон.

Меҳнатимиз шонисан,

Бахт-саодат конисан.

Яша, озод диёрим,

Халқимизнинг жонисан.

Тоғларингда кезганман,

Боғларингда кезганман,

Она диёр, меҳрингни

Ҳар қадамда сезганман.

Севдик сени умрбод,

Сен борсанки кўнгил шод.

Не буюрсанг биз тайёр:

Биз –– бахтиёр ёш авлод!


Adabiy o‘qish: Сафар Барноев. “Маҳалламиз” шеъри.
САФАР БАРНОЕВ

(1938-2001)

Болаларнинг севимли шоири ва ёзувчиси Сафар Барноев 1938 йил 6 майда Бухоро шаҳрида туғилган. 1949-59 йилларда ўрта мактабни тугатгач, ҳарбий хизматга кетади. 1961-66 йилларда ТошДУнинг (ҳозирги Ўзбекистон Миллий университети) журналистика бўлимида таҳсил олади.

1959 йили унинг биринчи шеъри ҳозирги „Тонг юлдузи“ газетасида эълон қилинган. Сафар Барноев ўқишни тугатмасиданоқ, 1966 йилнинг март ойида „Тонг юлдузи“ газетаси таҳририятига ишга таклиф қилинган. Шу йиллардан бошлаб унинг шеър, ҳикоя, қиссалари республика газета ва журналларида чоп этила бошлайди.

Сафар Барноевнинг биринчи шеърлар тўплами 1970 йилда „Тоғлардаман“ номи билан чоп этилди. Шундан кейин „Биринчи табассум“, „Нур ёғилган кун“ қиссалари босилди. Адибнинг „Биринчи табассум“ (қиссалар, 1972), „Соғинч“ (шеърлар, балладалар, 1975), „Юлдузхон ва Баҳодиржон“ (шеърлар ва эртаклар, 1977), „Аскар қайтган кун“ (ҳикоялар, қиссалар, 1980), „Оқ лайлаклар“ (ҳикоя, қиссалар, 1982), „Эгизаклар“ (ҳикоялар, қиссалар, 1985), „Мукофот“ (ҳикоялар, 1985), „Тинчликни улуғлаймиз“ (шеърлар, достонлар, 1986), „Каримжон-карлсон“ (ҳикоялар, қиссалар, 1988), „Дадам ҳақида қўшиқ“ (шеърлар, эртаклар, 1989), „Янги кунлар“ (қисса, 1990), „Нилуфарнинг олмалари“ (ҳикоялар, 1996), „Кичкина Хўжа Насриддин“ (қисса, 1998) сингари китоблари нашр қилинган. Адибнинг кўпгина асарлари рус, тожик, қирғиз, украин, белорус, поляк, инглиз тилларига таржима қилинган.