O’zbekiston respublikasi oliy va o’rta maxsus ta’lim vazirligi samarqand veterinariya meditsinasi instituti

TOKNING SERKOSPOROZ KASALLIGI

Tokning serkosporoz (yashil mog’or) kaslligi Yevropa, Shimoliy Amerika, MDH da Ukraina, Shimoliy Kavkaz va Kavkaz orti mamlakatlarida, Markaziy Osiyoda Qirg’iziston, Qozog’iston, Turkmaniston va O’zbekistonda tarqalgan.

Kasallikning belgilari. Kasallik ko’proq eski, qarovsiz qolgan uzum bog’larini zararlaydi. Kasallikning ikkita shakli mavjud: odatda may oyi va yozning birinchi yarmida rivojlanadigan bahorgi shakli (qo’zg’atuvchi Ragnhildiana roesleri) va yozning ikkinchi yarmida rivojlanadigan kuzgi shakli (qo’zg’atuvchi Cercospora vitis). Ular asosan barglarni zararlaydi (83-rasm). Bahorgi serkosporoz bilan zararlangan barglarning ostki tomonida bir tekis joylashgan yashilroq-zaytun tusli, konidiofora va konidiyalardan tashkil topgan g’ubor hosil bo’ladi, kuzgi shakl bilan zararlangan barglar ustida noaniq qo’ng’ir yoki qo’ng’ir-sarg’ish, qizil hoshiyali, kengligi 0,2-1 sm keladigan dog’lar, ostki tomonida esa barg to’qimalaridan dasta-dasta bo’lib chiqadigan zamburug’ning konidiofora va konidiyalari paydo bo’ladi. Har ikki kasallik barglar nobud bo’lishi va to’kilishiga olib keladi. Kasallik kuchli rivojlanganda novda, meva bandi va uzumda zaytun tusli g’ubor rivojlanadi, meva bandi quriydi, uzumlar to’kiladi. Uzumlar qattiqlashishi va ko’k tus olishi mumkin.